بەغداد -INA
جێگری فەرماندەی ئۆپراسیۆنە هاوبەشەکان و سەرۆکی لێژنەی باڵای زیارەتە ملیۆنییەکان، فەریق یەكەمی ڕوکن قەیس محەمەداوی، ئەمڕۆ سێشەممە، ڕێنمایی دا بە زیادکردنی ژمارەی ئەو ئۆتۆمبێلانەی کە تەرخانکراون بۆ گواستنەوەی زیارەتکاران لەسەر تەوەرەی (نەجەفی ئەشرەف - کەربەلای پیرۆز).
لێژنەی باڵای زیارەتە ملیۆنییەکان لە بەیاننامەیەكدا کە بۆ ئاژانسی هەواڵی عێراقی ناردووە، دەڵێت: "جێگری فەرماندەی ئۆپراسیۆنە هاوبەشەکان و سەرۆکی لێژنەی باڵای زیارەتە ملیۆنییەکان، فەریق یەكەمی ڕوکن قەیس محەمەداوی، ئەمڕۆ سێشەممە لە بارەگای حکومەتی خۆجێیی پارێزگای کەربەلای پیرۆز ئامادەی کۆنگرەیەکی تایبەتمەند بوو، بۆ تاوتوێکردنی جێبەجێکردنی پلانە تایبەتەکانی هاتووچۆ و گواستنەوە و جوڵەی زیارەتکاران و گواستنەوەی پێچەوانەیان، بە ئامادەبوونی ژمارەیەک لە پارێزگاران و نوێنەرانی وەزارەتە پەیوەندیدارەکان و فەرماندەکانی تەوەرەکان لە وەزارەتەکانی بەرگری و ناوخۆ و دەستەی حەشدی شەعبی، لەگەڵ ژمارەیەک لە بەڕێوەبەرانی هاتووچۆ لە پارێزگا پەیوەندیدارەکاندا."
لە کۆنگرەکەدا، بەپێی بەیاننامەكە، محەمەداوی جەختی لە "کۆمەڵێک بابەتی گرنگ کردەوە لەوەی پەیوەندیدارە بە هەوڵەکانی هاتووچۆ و خزمەتگوزاری"، و تەئكیدیشیکردەوە کە "دۆسیەی گواستنەوە گەورەترین ئاڵنگارییە کە ڕووبەڕووی هێزە ئەمنییەکان دەبێتەوە، کە ئەوەش دەخوازێت پرۆسەکانی گواستنەوە لە ئاستی خواستدا بن، بەتایبەتی لە پلانی گواستنەوەی پێچەوانەدا (گەڕاندنەوە)."
ناوبراو جەختی کردەوە لەسەر "ئاسانکاریی تێپەڕبوونی ئۆتۆمبێلەکان بۆ پارێزگای کەربەلا بە شێوەیەکی بەردەوام، و دانەخستنی دەروازەکانی کەربەلای پیرۆز"، هەروەها ڕێنمایی دا بە "زیادکردنی ژمارەی ئەو ئۆتۆمبێلانەی کە تەرخانکراون بۆ گواستنەوە لەسەر تەوەرەی (نەجەف - کەربەلا) بەهۆی ئەو قەرەباڵغییەی پێشبینی دەکرێت."
لە ڕووی ئەمنی و لۆجستییەوە، محەمەداوی دووپاتیكردەوە: لە "پێویستیی پاراستنی ئاسانیی جوڵە لە شاری کەربەلای پیرۆز، و گرنگیدانی زۆر بە جێبەجێکردنی پلانی گواستنەوەی پێچەوانە بۆ دابینکردنی ئاسایش و بەڕێوەبردنی جوڵەی گەڕاندنەوەی زیارەتکاران بۆ ناوچەکانی خۆیان بە سەلامەتی و ئاسانی."