بەغدا - INA
ئەمڕۆ دووشەممە، ئەنجومەنی باڵای دادوەری، دەستبەسەرداگرتنی 25 ملیار دیناری عێراقی نوێی لە دۆسیەی بریکاری وەزارەتی نەوت بۆ کاروباری پاڵاوتن ڕاگەیاند.
لە ڕاگەیەندراوێکی ئەنجومەنی دادوەریدا کە دەستی ئاژانسی هەواڵی عێراقی (INA) کەوتووە، هاتووە: "دادوەری لێکۆڵینەوەی دادگای باڵای تاوانەکانی دژایەتیکردنی گەندەڵی ناوەندی، پڕۆسەی دەستبەسەرداگرتنی 25 ملیار دیناری عێراقی نوێی ڕوون کردووەتەوە، سەرەڕای دەستبەسەرداگرتنی بڕی 1 ملیۆن دۆلار، لەگەڵ دەستبەسەرداگرتنی زێڕ و خشڵ کە بڕەکەی بە نزیکەیی 5 کیلۆگرام دەخەمڵێندرێت، ئەمەش لە چوارچێوەی دۆسیەی بریکاری وەزارەتی نەوت بۆ کاروباری پاڵاوتن، تۆمەتباری ڕاگیراو عەدنان جومەیلی و ئەو لایەنانەی تری کە لەگەڵیدا تێوەگلاون".
ئاماژەی بەوەشکرد: "دادوەرە تایبەتمەندەکە ڕایگەیاندووە کە لە ئەنجامی بەدواداچوونی وورد بۆ دەستبەسەرداگرتنی ئەو دەستکەوتە داراییانەی کە لە ئەنجامی بەفیڕۆدان (هەدەردان) لەو پڕۆژانەی لەلایەن تۆمەتبار و لایەنەکانی تری دۆسیەکەوە جێبەجێ کراون، بووەتە هۆی دەستبەسەرداگرتنی ئەم بڕە پارانە کە لە ناو دەبەی ئاوی پلاستیکیدا داخرابوون و لە ناو ماڵی تۆمەتبارەکەدا لە شاری تکریت حەشاردرابوون".
لە کۆتاییدا تیشکی خستە سەر ئەوەی کە "کۆی گشتیی بڕە پارە داراییە دەستبەسەرداگیراوەکان بەرزبووەتەوە بۆ 127 ملیار دینار و 24 ملیۆن دۆلار، سەرەڕای ئەو خانوو، زەوی و ئۆتۆمبێلانەی کە دەستیان بەسەردا گیراوە و ئەو زێڕ و خشڵانەی دۆزراونەتەوە"، هاوکات جەختیشی کردەوە کە "لێکۆڵینەوەکان و ڕاوەدوونانی تێوەگلاوانی دیکە بەردەوامن تاوەکو تەواوکردنی سەرجەم ڕێکارە یاساییەکان".