بەغدا - INA
دەستەی ڕاگەیاندن و پەیوەندییەکان، ئەمڕۆ هەینی جەختی کردەوە لە بەردەوامیی هەڵمەتەکەی بۆ کۆتاییهێنان بە سیستمەکانی پەخشی تەلەفزیۆنیی کۆدکراوی بێ مۆڵەت، هاوکات هۆشداریشی دایە هاووڵاتیان لە مامەڵەکردن لەگەڵیاندا.
دەستەکە لە ڕاگەیەندراوێکدا، کە بۆ ئاژانسی هەواڵی عێراقی (INA) نێردراوە، ڕایگەیاند: "تیمە تەکنیکییەکانی دەستەی ڕاگەیاندن و پەیوەندییەکان، بە هاوکاری لایەنە دادوەری و ئەمنییە پسپۆڕەکان، زنجیرەیەک ئۆپەراسیۆنی دەستبەسەرداگرتنیان دژی سیستمەکانی پەخشی تەلەفزیۆنیی کۆدکراو ئەنجامدا کە بەبێ مۆڵەت یان ڕەزامەندی فەرمی کار دەکەن؛ ئەمەش لە چوارچێوەی هەڵمەتێکی بەردەوامدایە بۆ بنبڕکردنی هەموو چالاکییە نایاساییەکان و جێبەجێکردنی یاسا."
بەپێی ڕاگەیەندراوەکە، ئەم ڕێکارانە پشتبەست بەو دەسەڵاتانە دەگیرێنە بەر کە بەپێی فەرمانی یاسایی ژمارە (٦٥)ی ساڵی ٢٠٠٤ بە دەستەکە دراون. ئاماژە بەوەش کراوە کە هەڵمەتەکە تاوەکو ڕاگرتنی تەواوی سیستمە بێ مۆڵەتەکان بەردەوام دەبێت و سەرپێچیکارانیش ڕەوانەی دادگا دەکرێن.
دەستەکە هۆشداریی دایە هاووڵاتیان و هەموو لایەنەکان لە "مامەڵەکردن لەگەڵ خزمەتگوزارییەکانی پەخشی تەلەفزیۆنیی زەمینی کە بە سیستەمی (KU Band) کار دەکەن، چ لە ڕێگەی بەشداریکردن یان کڕینی ئامێرەکانیان؛ چونکە خزمەتگوزاریی بێ مۆڵەتن و پێچەوانەی یاسا کارپێکراوەکانن."
ڕوونیشیکردەوە کە بەشداربووان لەم جۆرە پەخشانە ڕەنگە پارەکانیان فەوتێت بەبێ ئەوەی هیچ پاراستنێکی یاسایییان هەبێت. جەختیشی کردەوە کە هاوردەکردن، فرۆشتن، ڕیکلامکردن یان کارپێکردنی ئەم ئامێرانە بەرپرسیارێتی یاسایی دەخاتە سەر لایەن و کەسانی سەرپێچیکار.
لە کۆتاییدا، دەستەی ڕاگەیاندن و پەیوەندییەکان داوای لە هاووڵاتیان کرد تەنها پشت بەو خزمەتگوزارییانە ببەستن کە مۆڵەتی فەرمییان هەیە، و هەر لایەنێکیش بناسێنن کە پەخشی بێ مۆڵەت ئەنجام دەدات یان ڕیکلامی بۆ دەکات، ئەمەش لەپێناو پاراستنی مافی بەکاربەران و پاراستنی کەرتی ڕاگەیاندن و پەیوەندییەکان لە عێراق.