قاهیرە - INA - ئەحمەد محەممەد ساڵح
پەرلەمانتار حەنان فەتلاوی، ئەمڕۆ سێشەممە دووپاتی کردەوە کە هەڵبژاردنی وەک جێگری سەرۆکی پەرلەمانی عەرەبی بە سەرکەوتنێک بۆ عێراق و ئافرەتی عێراقی دادەنرێت، هاوکات ئاماژەی بەوە کرد کە کار بۆ بەرزڕاگرتنی ناوی عێراق دەکات.
فەتلاوی لە میانی بەشداریکردنی لە دانیشتنی گشتیی پەرلەمانی عەرەبی و هەڵبژاردنی وەک جێگری سەرۆکی پەرلەمانەکە بە ئاژانسی هەواڵی عێراقی (INA)ی ڕاگەیاند: "خۆشحاڵم بە هەڵبژاردنم لەمڕۆدا وەک جێگری سەرۆکی پەرلەمانی عەرەبی کە نوێنەرایەتیکردنی وڵاتەکەمە"، هیوایشی خواست کە "عێراق لە سەرجەم کۆڕ و کۆبوونەوە عەرەبی و نێودەوڵەتییەکاندا ئامادەیی هەبێت".
وتیشی: "ئەمە یەکەمجارە ئافرەتێک وەک جێگری سەرۆکی پەرلەمانی عەرەبی هەڵبژێردرێت لە ماوەی زیاتر لە ٤ ساڵدا، ئەمەش سەرکەوتنێکە بۆ عێراق و بۆ ئافرەتی عەرەب و بەتایبەتی بۆ ئافرەتی عێراقی"، سوپاسی "سەرۆکی پەرلەمان هەیبەت حەلبووسی کرد بۆ پشتیوانی و هاوکارییەکەی لەم کاندیدبوونە".
هەروەها سوپاسی پەرلەمانتارە عێراقی و عەرەبەکانی لە پەرلەمانی عەرەبیدا کرد و دووپاتی کردەوە کە "کار دەکەم بۆ ئەوەی لە ئاستی متمانەی گەلی عەرەبیدا بم و کار بۆ بەرزڕاگرتنی ناوی عێراق و گەیاندنی دەنگی عێراقی بە کۆڕ و کۆبوونەوە عەرەبی و نێودەوڵەتییەکان دەکەم".
جەختیشی کردەوە: "ماوەی چوار ساڵە کار دەکەم و وەک پەرلەمانتارێک لە پەرلەمانی عەرەبیدا بووم بۆ گەیاندنی دەنگی عێراقی و گۆڕینی زۆرێک لە ڕوانگەکان لەسەر عێراق و عێراقییەکان و دۆخی ناوخۆی عێراق، و دانیشتنێکی پەرلەمانی عەرەبیمان لە بەغداد میوانداری کرد"، ئاماژەی بەوەش کرد کە "ئێمە ئەمڕۆ کار دەکەین بۆ گەیاندنی دەنگی عێراقی و پەسەندکردنی ئەو پڕۆژانەی کە لە ڕێگەی پەرلەمانی عەرەبییەوە پشتیوانییان دەکەین".