بەدواداچوون – INA
ئەمڕۆ دووشەممە، جێگری وەزیری دەرەوەی ئێران، کازم غەریب ئابادی، جەختی کردەوە کە ئێران بە تەنیا پڕۆسەی لادانی مینەکان لە گەرووی هورمز دەگرێتە ئەستۆ، و بەپێی یاداشتی لێکتێگەیشتنەکە هیچ وڵاتێک لەم پڕۆسەیەدا بەشداریی لەگەڵدا ناکات.
ئابادی لە بڵاوکراوەیەکدا لەسەر تۆڕی کۆمەڵایەتیی (X) ڕایگەیاند: "هیچ وڵاتێک لە هەڵگرتنەوەی مینەکانی گەرووی هورمزدا بەشداریمان ناکات، و لە بنەڕەتیشەوە ڕێگە بە شتێکی لەو شێوەیە نادەین"، ڕوونیشی کردەوە کە "بارودۆخی گەرووی هورمز هەستیار و ئاڵۆزە، و بە توندی ئامۆژگاریی فەرەنسا دەکەین کە بە ئیستفزازەکانی (تەحەددییەکانی) دۆخەکە ئاڵۆزتر نەکات".
لەلایەکی تەرەوە، وتەبێژی وەزارەتی دەرەوەی ئێران، ئیسماعیل بەقایی، لە لێدوانێکی ڕۆژنامەوانیدا کە ئاژانسی هەواڵی عێراقی (INA) بەدواداچوونی بۆ کردووە، ڕایگەیاند: "شاندێکی ئێرانی سەردانی دەوحە دەکات بۆ بەدواداچوونی جێبەجێکردنی بەندەکانی یاداشتی لێکتێگەیشتنەکە، بەتایبەت کێشەی پارە بلۆککراوەکان".
وتیشی: "لە ڕۆژانی داهاتوودا هیچ کۆبوونەوەیەکی دانوستاندن لەسەر هیچ ئاستێک لەگەڵ لایەنی ئەمریکیدا ئەنجام نادەین"، ئاماژەی بەوەش کرد کە "سەردانی نوێنەرانی ئەمریکا بۆ قەتەر هیچ پەیوەندییەکی بە سەردانی شاندەکەی ئێرانەوە نییە".
ئاماژەی بەوەشکرد : "ئێمە تیشک دەخەینە سەر جێبەجێکردنی بەندەکانی یاداشتی لێکتێگەیشتنەکە و بە جدییەوە هەوڵ بۆ بەدیهێنانی داواکارییەکانمان دەدەین، و هێشتا نەچووینەتە قۆناغی دانوستاندن لەسەر ڕێککەوتنی کۆتایی"، هاوکات پێداگریشی کرد کە "دەستپێکردنی دانوستاندنی ڕێککەوتنی کۆتایی بەندە بە دەستپێکردنی جێبەجێکردنی ماددەکانی 1، 4، 5، 10 و 11 و بەردەوامبوون لە جێبەجێکردنیان".