بەغدا - INA
ئەمڕۆ دووشەممە، تیمی زانکۆی دهۆک، بووە پاڵەوانی پاڵەوانێتیی زانکۆکانی کوردستان بۆ فوتساڵ (تۆپی پێی ناو هۆڵ)، دوای ئەوەی لە یاریی کۆتاییدا و دوای پێشکەشکردنی ئەدایەکی بەهێز لەلایەن هەردوو تیمەوە، لە زانکۆی سلێمانی بردەوە.
یاریی کۆتایی لە هۆڵی کۆلێژی پەروەردەی جەستەیی و زانستە وەرزشییەکانی زانکۆی سەڵاحەدین لە هەولێر، بە ئامادەبوونی ژمارەیەکی زۆر لە هاندەران بەڕێوەچوو، کە تێیدا یارییەکە بە چوار گۆڵ بەرامبەر بە سێ گۆڵ کۆتایی هات.
یارییەکە بە ئامادەبوونی هەریەکە لە بەڕێوەبەری گشتیی وەرزش، سەردار ئیسماعیل، بەڕێوەبەری گشتیی کۆمپانیای کیا-نیم، محەمەد ئەلزێر، ڕاگرانی هەردوو کۆلێژی پەروەردەی جەستەیی و زانستە وەرزشییەکانی سلێمانی و دهۆک، ئەحمەد بەهائەدین و زیاد مەحفوز، و سەرپەرشتیاری پاڵەوانێتییەکە سامان برێفکانی بەڕێوەچوو.
جێی ئاماژەیە، کۆمپانیای کیا-نیم، کە سپۆنسەری سەرەکایی جامی جیهانیی 2026ە، پاڵەوانێتیی زانکۆکانی کوردستان بۆ فوتساڵی بە بەشداریی 20 تیم لە زانکۆ حکومی و تایبەتەکان، و بە پاڵپشتیی وەزارەتی خوێندنی باڵا و بەڕێوەبەرایەتیی گشتیی وەرزش لە هەرێم ڕێکخستبوو. خەڵاتی تیمی پاڵەوان بریتییە لە گەشتێکی گەشتیاریی یەک هەفتەیی بۆ سەرجەم ئەندامانی شاندەکە بۆ شاری ئەستەنبوڵی تورکیا، پاڵەوانێتییەکەش بە هاوکاریی کۆلێژە وەرزشییەکانی زانکۆکانی هەولێر، سلێمانی و دهۆک ئەنجام درابوو.
لە کۆتاییدا، لە ناو کەشێکی ئاهەنگگێڕانی یاریزانان و سەرپەرشتیارانی هەردوو تیمدا، خەڵاتەکان بەسەر تیمی پاڵەوان و خاوەن پلەی دووەمدا دابەشکران.