بەغدا – INA
ئەمڕۆ یەکشەممە،عەبدولحوسێن موسەوی،سەرۆکی هاوپەیمانی "نەهجی وەتەنی"، پشتیوانی خۆی بۆ هەڵمەتی "بەرەبەیان" بۆ بەرەنگاربوونەوەی گەندەڵی ڕاگەیاند و بە هەنگاوێکی بەرپرسانەی وەسف کرد لە پێناو گێڕانەوەی شکۆی دەوڵەت و پاراستنی سامانی گشتی.
موسەوی،لە ڕاگەیەندراوێکدا کە بۆ ئاژانسی هەواڵی عێراقی (INA) ناردوویەتی، تیایدا هاتووە : پشتیوانی حکومەتی عێراق، و دەسەڵاتی دادوەری و دەزگا چاودێری و ئەمنییەکان دەکەین لە هەڵمەتی "بەرەبەیان" بۆ بەرەنگاربوونەوەی گەندەڵی،کە ئەمە بە هەنگاوێکی بەرپرسانە دەزانین بۆ گێڕانەوەی شکۆی دەوڵەت، پاراستنی سامانی گشتی و تێکشکاندنی ئەو قۆرخکارییەی کە تۆڕەکانی دەسەڵات بۆ پاراستنی ئەو کەسانەی تێوەگلاون لە دۆسیەکانی بەفیڕۆدانی سامانی گشتی دروستیان کردووە.
بەگوێرەی ناوەرۆکی راگەیەندراوەکە : گەندەڵی چیتر کەمکوڕییەکی کارگێڕیی تێپەڕ نییە، بەڵکو بووەتە مەترسییەک کە گەل ماندوو دەکات،و سامانەکان بەهەدەر دەدات،و دامەزراوەکانی دەوڵەت دادەڕزێنێت و متمانەی هاوڵاتی بە ئەگەری چاکسازی لەدەست دەدات، لەبەر ئەوە، هەر هەوڵێکی جددی بۆ بەدواداچوونی تۆمەتبارانی گەندەڵی دەبێت پشتیوانی سیاسی و جەماوەریی هەبێت.
وەک راگەیەندراوەکە ئاماژەی پێداوە : هیوادارین سەرجەم لێکۆڵینەوەکان تەواو بکرێن، و ڕاستییەکان ئاشکرا بکرێن،و پارە دزراوەکان بگەڕێندرێنەوە و سامانی گشتی لە دەستی گەندەڵکاران و خاوەن دەسەڵاتەکان بپارێزرێت، کە ئەمە دەرفەتێکە بۆ گێڕانەوەی متمانە لەنێوان هاوڵاتی و دامەزراوەکانی دەوڵەت لە عێراق.