بەغداد – INA
سەرۆکی فەرمانگەی پەیوەندییەکان و ڕاگەیاندن لە وەزارەتی ناوخۆ لیوا میقداد میری، ئەمڕۆ چوارشەممە، دەستنیشانکردنی ٩٧ دەنگۆی لە ماوەی ڕۆژانی یەکەمی مانگی موحەڕەمی حەرامدا ڕاگەیاند.
میری لە بەیاننامەیەکاندا کە بۆ ئاژانسی هەواڵی عێراقی ناردووە، دەڵێت: "بەشی چاودێری لە فەرمانگەکە لە ماوەی ڕۆژانی یەکەمی مانگی موحەڕەمی حەرامدا بەدواداچوونی بۆ ئەو بابەتانە کردووە کە لە ڕێگەی تۆڕە کۆمەڵایەتییەکان و پلاتفۆرمە جیاوازە دیجیتاڵییەکانەوە بڵاودەکرێنەوە، کە تێیدا ٩٧ دەنگۆ دەستنیشانکراون کە هەمەجۆر بوون لە نێوان ئەمنی، سیاسی، خزمەتگوزاری و کۆمەڵایەتی".
وتیشی: "پلاتفۆرمی فەیسبووک بەرزترین ڕێژەی لە بڵاوکردنەوەی دەنگۆکاندا تۆمارکردووە بە واقیعی ٣٩ دەنگۆ کە دەکاتە ٤٠٪ی کۆی گشتی ئەو دەنگۆیانەی دەستنیشانکراون، لە دوای ئەویش پلاتفۆرمی (X) دێت بە واقیعی ٣٤ دەنگۆ و بە ڕێژەی ٣٥٪، پاشان ئەپڵیکەیشنی تێلیگرام بە واقیعی ٢٤ دەنگۆ و بە ڕێژەی ٢٥٪".
ئاماژەی بۆ ئەوەشكرد: "دەنگۆ ئەمنییەکان لە پێشەنگی دیمەنەکەدا بوون بە ڕێژەی ٥٦٪، لە دوای ئەوانیش دەنگۆ سیاسییەکان بە ڕێژەی ٢٠٪، پاشان خزمەتگوزارییەکان بە ڕێژەی ١٥٪، لەکاتێکدا ڕێژەی دەنگۆ کۆمەڵایەتی و ئاینییەکان گەیشتە ٩٪".
وتیشی: "هاووڵاتییان و زیارەتکاران ئەو چینە بوون کە زۆرترین جار بەو دەنگۆیانە کراونەتە ئامانج بە ڕێژەی ٤٤٪، لە دوای ئەوانیش هێزە ئەمنییەکان دێن بە ڕێژەی ٣٠٪، پاشان دامەزراوە حکومییەکان و فەرمانگە خزمەتگوزارییەکان بە ڕێژەی ٢٦٪".
میری بەپێی بەیاننامەکە جەختیکردەوە: "ئەنجامەکانی چاودێریکردنەکە دەریانخستووە کە ٤٢٪ی دەنگۆکان کاریگەرییان بەرز بووە، لەکاتێکدا ڕێژەی ئەو دەنگۆیانەی کاریگەرییان زۆر بەرز بووە گەیشتووەتە ٢٩٪، و ئەو دەنگۆیانەی کاریگەرییان مامناوەند بووە ٢٩٪ بووە"، ڕوونیشی کردەوە کە "ئەم ژمارانە گرنگیی بەهێزکردنی هۆشیاریی کۆمەڵایەتی و نەکەوتنە داوی هەواڵە بێبنەماکان دووپات دەکەنەوە".
داواشی لە هاووڵاتییان، دەزگاکانی ڕاگەیاندن و بەکارهێنەرانی تۆڕە کۆمەڵایەتییەکان کرد کە "پشت بە سەرچاوە فەرمییەکان ببەستن بۆ بەدەستهێنانی زانیارییەکان، و هەواڵە پشتڕاستنەکراوەکان بڵاونەکەنەوە، بەهۆی ئەو ڕۆڵە گرنگەی کە ئەمە هەیەتی لە پاڵپشتیکردنی سەقامگیری ئەمنی و کۆمەڵایەتی لە ماوەی وەرزی بەڕێوەچوونی ڕێوڕەسمە حوسێنییەکاندا".