بەغدا – INA
ئەمڕۆ دووشەممە، جێگری فەرماندەی ئۆپەراسیۆنە هاوبەشەکان و سەرۆکی لێژنەی باڵای ئەمنی بۆ سەردانە ملیۆنییەکان، فەریقی یەکەمی روکن قەیس محەمەداوی، بەڕێوەچوونی پلانی ڕێکخستنی ڕۆژانی عاشورای حوسێنی و سەردانی چلەی تاوتوێ کرد، هاوكات 5 ڕێنمایی دەرکرد.
لە ڕاگەیەندراوێکی لێژنەی باڵای ئەمنی بۆ سەردانە ملیۆنییەکاندا کە دەستی ئاژانسی هەواڵی عێراقی (INA) کەوتووە، هاتووە: "جێگری فەرماندەی ئۆپەراسیۆنە هاوبەشەکان و سەرۆکی لێژنەی باڵای ئەمنی بۆ سەردانە ملیۆنییەکان، فەریقی یەکەمی روکن قەیس محەمەداوی، سەرۆکایەتیی کۆنفرانسێکی کرد لە ناوەندی ئۆپەراسیۆنە هاوبەشەکان لە بارەگای فەرماندەیی، بە مەبەستی تاوتوێکردنی بەڕێوەبوونی پلانی ڕێکخستن و هەماهەنگیی تایبەت بە زیندووکردنەوەی ڕۆژانی عاشورای حوسێنی (سڵاوی خوای لێبێت) و سەردانی چلە، بە ئامادەبوونی سەرۆکی ئەرکانی فەرماندەیی و دەستەی ڕوکن تێیدا".
محەمەداوی جەختی لەسەر "کۆمەڵێک ڕاسپاردەی گرنگ کردەوە، کە لە پێشەنگیاندا بەدواداچوونی جێبەجێکردنی سەرجەم بڕگەکانی پلانەکە و ئەو بابەتانەی پەیوەستن بە نەرمونیانیی هاتوچۆ لە تەوەرەکانی سەردانکەراندا، و پاراستنی ئەمنییەتی کەرتەکانی بەرپرسیارێتی لە ڕێگەی ئامادەبوونی مەیدانییەوە".
جەختیشی کردەوە لەسەر "بەردەوامبوونی هەماهەنگیی هاوبەش لەگەڵ ئەفسەرانی پەیوەندی لە وەزارەتەکان و ئاژانسە هەواڵگرییەکاندا، سەرڕای جەختکردنەوە لەسەر ئاسانکاریی هاتنی گەشتیاران لە سەرجەم دەروازەکانەوە و هەماهەنگی لەگەڵ وەزارەتی ناوخۆ و دەسەڵاتی فڕۆکەوانیی سڤیل"، هاوکات ڕێنماییەکیشی دا بە "چڕکردنەوەی کارە ئەمنییەکان لە ناوچە سنوورییەکاندا".
ڕوونیشی کردەوە کە "عێراق بووەتە جێی سەرنجی جیهان، بەتایبەتی دوای سەرکەوتنی لە بەڕێوەبردنی چەندین بۆنەدا کە ملیۆنان کەس لە ناوەوە و دەرەوەی وڵات زیندووی دەکەنەوە".