بەغداد - INA
بیلال حەمدانی سەرۆکی ئەنجومەنی کارگێڕیی بانکی بازرگانیی عێراق (TBI)، جەختی لەسەر گرنگیی هاوبەشی لەگەڵ ڕاگەیاندنی پیشەیی کردەوە، ئاماژەی بەوەشکرد: کۆبوونەوەی خولی لەگەڵ ڕۆژنامەنووسان و ڕاگەیاندکارانی پیشەیی ساز دەکرێت بۆ دابینکردنی زانیارییە ئابوورییە وردەکان بۆیان، بە شێوەیەک کە بەشدار بێت لە هۆشیارکردنەوەی هاووڵاتیان و سنووردارکردنی بڵاوبوونەوەی زانیارییە ناڕاستەکان و پاراستنی ڕایگشتی لە دەنگۆکان.
ئەمەش لە کاتی پێشوازیکردنی لە کۆمەڵێک ڕۆژنامەنووس، ڕاگەیاندکار و شارەزایانی ئابووری هات، بە ئامادەبوونی سەباح ساعدی جێگری سەرۆکی بانکەکە، لە دیدارێکی گفتوگۆاییدا کە تێیدا تیشک خرایەسەر ڕۆڵی ڕاگەیاندنی ئابووری و گرنگیی بەهێزکردنی پەیوەندی نێوان دامەزراوە داراییەکان و دەزگاکانی ڕاگەیاندنی پیشەیی.
حەمدانی ستایشی ڕەخنەی بونیادنەر و ڕۆژنامەگەریی ئازادی کرد و جەختیکردەوە: هیچ ڕێگرییەک لە ڕەخنەگرتن بە شێوازێکی دروست نییە، و تیشکی خستە سەر گرنگیی بەردەوامبوون لە هۆشیارکردنەوەی هاووڵاتیان.
دیدارەکە چەندین سەرنج و تێبینی بەخۆیەوە بینی، کە تێیدا ڕۆژنامەنووس عەباس عەبوود داوای پاڵپشتیکردنی پلاتفۆرمە ڕاگەیاندنە پیشەییەکانی کرد؛ بەمەبەستی بەشداریکردن لە بەرزکردنەوەی هۆشیاری ئابووری و ڕۆشنبیرکردنی هاووڵاتیان، لە کاتێکدا ڕۆژنامەنووس نەسیڕ عەوام جەختی لەسەر گرنگیی کردنەوەی دەرگاکانی بانکەکە بە ڕووی ڕۆژنامەگەریی ناوخۆیی و بەهێزکردنی هاوکاری لەگەڵیدا کردەوە.
لەلایەن خۆیەوە، وەفدە ڕۆژنامەوانییەکە ئاماژەی بەوە کرد کە عێراق پێویستی بە بەڕێوەبردن و پلاندانانی زیاتر هەیە، و تیشکی خستە سەر گرنگیی بڵاوکردنەوەی ڕێنمایی و بڕیارەکان بە شێوەیەکی بەردەوام؛ بەهۆی ئەو متمانەیەی کە بانکەکە لەلای ڕای گشتی هەیەتی، لە کاتێکدا ڕۆژنامەنووسان جەختیان کردەوە کە ئەزموونی TBI بە یەکێک لە ئەزموونە سەرکەوتووەکانی بانکداری دادەنرێت و ئەم هەڵسەنگاندنەش خراوەتە بەردەم سەرۆکی ئەنجومەنی وەزیران، و ستایشی ئاستی ئەو متمانەیەی کرد کە بانکەکە پێی شاد بووە.
لەلایەکی دیکەوە، ژمارەیەک لە ڕۆژنامەنووسانی ئابووری ڕوونیانکردەوە کە ئاڵۆزی و تەحەددا ئابوورییەکان پێویستیان بە گوتارێکی ڕاگەیاندنی پیشەیی هەیە، و ڕایانگەیاند: کاریگەریی ڕۆژنامەنووسی پیشەیی لە گەیاندنی ڕاستییەکاندا ڕەنگە زۆر کاراتر بێت لە کەمپینە ڕاگەیاندنە نەریتییەکانی خودی دامەزراوەکان.
شایەنی باسە لەم دیدارەدا نوێنەرانی تۆڕی ڕاگەیاندنی عێراقی و سەندیکای ڕۆژنامەنووسانی عێراق، لەگەڵ چەندین سەرنووسەری ڕۆژنامەکان و ڕاگەیاندکاران و بایەخدەران بە کاروباری ئابووری ئامادە بوون، لە پێناو هەنگاوێک کە ئامانج لێی چەسپاندنی هاوبەشی نێوان کەرتی بانکداری و ڕاگەیاندنی پیشەیییە.