بەدواداچوون- INA
بەپێی ڕاپۆرتی دەستەی ڕووپێوی جیۆلۆجیی ئەمریکی، بوومەلەرزەیەکی بەهێزی سەر زەوی بە گوڕی 6.7 پلە ناوچەی سولاوێسی لە ناوەڕاستی ئیندۆنیزیا هەژاند، و دەسەڵاتدارانیش کوژرانی کەسێک و برینداربوونی زیاتر لە دە کەسیان ڕاگەیاند.
بوومەلەرزەکە لە قووڵاییەکی سنوورداردا لە کاتژمێر 10:27ی بەیانی بە کاتی ناوخۆ (03:27 بە کاتی گرینێچ) لە ناوچەیەک لە باشووری ڕۆژهەڵاتی بالو لە پارێزگای سولاوێسی ناوەڕاست ڕووی دا.
دەستەی کەشناسی و کەشوهەوا و جیۆفیزیکی ئیندۆنیزیا ڕایگەیاند کە دانیشتووانی بالو و سیگی بە توندی هەستیان بە بوومەلەرزەکە کردووە، بەڵام ڕوونکردنەوەی دا کە هیچ مەترسییەک نییە بۆ دروستبوونی تسونامی.
بە گوتەی عەبدولمەهاری، وتەبێژی ئاژانسی بەڕێوەبردنی کارەساتەکان، کەسێک لە سیگی گیانی لەدەستداوە کە نزیکەی بیست کیلۆمەتر لە بالو دوورە، و زیاتر لە دە کەسیش بە سەختی بریندار بوون.
وتەبێژەکە ئاماژەی بەوەشکرد، دەیان خانوو لە بالو، سیگی و باریگی مۆتۆنگ زیانیان بەرکەوتووە، هاوکات پرد، باڵەخانەی کارگێڕی و هۆتێلێکیش زیانیان پێگەیشتووە.
ئیندۆنیزیا کە دورگەیەكی بەرفراوانە لە باشووری ڕۆژهەڵاتی ئاسیا، بەهۆی کەوتنی لەسەر "ئەڵقەی ئاگر" لە زەریای هێمندا، بەردەوام ڕووبەڕووی بوومەلەرزەی یەک لەدوای یەک دەبێتەوە.