بەغداد – INA
یاریدەدەری ئەمینداری گشتیی نەتەوە یەکگرتووەکان، عەبدوڵڵا دەردەری، ئەمڕۆ سێشەممە جەختی کردەوە کە دەستپێشخەریی "لێدانی دڵی بەغداد" (نبض بغداد) پڕۆژەیەکی ناوازەیە و توانیویەتی دڵی مێژوویی بەغداد زیندوو بکاتەوە و بیگوازێتەوە بۆ داهاتوو، هاوکات دەرفەتی کاری بۆ پەرەپێدان و داهێنان ڕەخساندووە.
ڕابیتەی بانکە تایبەتەکانی عێراقی لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه: "سەرۆکی ڕابیتەی بانکە تایبەتەکانی عێراق و ئەندامی دەستپێشخەریی 'لێدانی دڵی بەغداد'، وەدیع حەنزەل، پێشوازی لە یاریدەدەری ئەمینداری گشتیی نەتەوە یەکگرتووەکان، عەبدوڵڵا ئەلدەردەری کرد لە ماوەی سەردانەکەیدا بۆ کۆنەشارەکەی بەغداد".
ڕاگەیەندراوەکە ئاماژەی بەوەش کردووە: "ئەلدەردەری بەسەرکردنەوەیەکی مەیدانیی لە ناو کۆڵان و شەقامەکانی کۆنەشارەکەدا ئەنجامدا، و لە نزیکەوە ئاگاداری وردەکاریی پڕۆژە جێبەجێکراوەکان بوو"، لە هەمان کاتدا ستایشی "ئەو هەوڵە نائاساییانەی کرد کە بۆ نۆژەنکردنەوەی شوێنەوارە کەلەپووری و مێژووییەکان دراون، بە جۆرێک کە ناسنامە ڕەسەنەکەیان بپارێزرێت و لەگەڵ پێداویستییەکانی گەشەسەندندا بگونجێن".
بەپێی ڕاگەیەندراوەکە – یاریدەدەری ئەمینداری گشتیی نەتەوە یەکگرتووەکان، عەبدوڵڵا دەردەری وتی: "دەستپێشخەریی لێدانی دڵی بەغداد پڕۆژەیەکی ناوازەیە و توانیویەتی دڵی مێژوویی بەغداد زیندوو بکاتەوە و بیگوازێتەوە بۆ داهاتوو، و دەرفەتی کاری بۆ پەرەپێدان و داهێنان ڕەخساندووە"، ئاماژەی بەوەش دا کە "کۆنەشارەکە هەستی ئارامی و دڵنیایی بە سەرجەم سەردانکەرانی دەبەخشێت، بۆیە ئێمە لە نەتەوە یەکگرتووەکاندا پاڵپشتی ئەم پڕۆژە گەورانە دەکەین".
ڕاگەیەندراوەکە ڕوونیشی کردووەتەوە کە "ئەم سەردانە و پاڵپشتییە نێودەوڵەتییە، تیشک دەخاتە سەر گرنگیی پاراستنی مورووسی ڕۆشنبیری و مێژوویی شاری بەغدادی پایتەخت، بۆ ئەوەی دەرفەتی بەهێز و بەڵێندەر بۆ گەنجان دابین بکات".
ئەوەشی خستووەتەڕوو کە "دەستپێشخەریی لێدانی دڵی بەغداد لەژێر چاودێریی سەرۆک وەزیران عەلی فالح زەیدیدایە، و لەلایەن ئەمیندارێتی بەغدادەوە سەرۆکایەتی دەکرێت، و چەندین لایەنی حکومی تێیدا ئەندامن، کە لەلایەن بانکی ناوەندیی عێراقەوە داراییەکەی دابین دەکرێت، و لەژێر سەرپەرشتی و جێبەجێکردنی ڕابیتەی بانکە تایبەتەکانی عێراقدایە".