بەغداد – INA
شانەی ڕاگەیاندنی ئەمنی، ئەمڕۆ پێنجشەممە، ئەنجامدانی دوو هێرشی ئاسمانی لەلایەن فڕۆکەکانی F-16ی عێراقییەوە ڕاگەیاند، کە مەفرزەیەکی تیرۆریستییان لە باشووری بەهرز لە پارێزگای دیالە کردووەتە ئامانج کە سەرکردەیەکی تێدابووە.
شانەکە لە بەیاننامەیەکدا کە بۆ ئاژانسی هەواڵی عێراقی ناردووە، دەڵێت: "بە هیمەتی پیاوانی دڵسۆز بۆ نیشتمانەکەیان عێراق، و لەسەر بنەمای زانیاری ورد کە لای بەڕێوبەرایەتی هەواڵگری سەربازی بەردەستبوو دەربارەی بوونی مەفرزەیەکی تیرۆریستی لە ناوچەی باشووری بەهرز (لە چوارچێوەی کەرتی فەرماندەیی ئۆپەراسیۆنەکانی دیالە)، پلانێکی چاودێری و ڕووپێوی ئاسمانی چڕ بە هەماهەنگی لە نێوان شانەی بەئامانجکردن لە فەرماندەیی ئۆپەراسیۆنە هاوبەشەکان و بەڕێوبەرایەتییەکە داڕێژرا کە بۆ چەند ڕۆژێک بەردەوام بوو".
ئاشكراشیكرد: "دوای دڵنیابوونەوە لە بوونی مەفرزەکە کە لە دوو تیرۆریست پێکهاتبوو و یەکێکیان سەرکردەیەکی گرنگی داعش بوو، بازە دڵسۆزەکانی ئاسمان لە ڕێگەی فڕۆکەکانی F-16ەوە دوو هێرشی ئاسمانی سەرکەوتوویان ئەنجامدا"، رونیشیكردەوە: "هاوکات لەگەڵ هەردوو هێرشەکەدا کە ئەمڕۆ پێنجشەممە ئەنجامدران، هێزێکی وشکانی دەستبەجێ بەرەو ناوچەی هێرشەکە کەوتەڕێ بۆ ئەنجامدانی پشکنین و پاککردنەوەی شوێنەکە".
شانەکە جەختیکردەوە: "هێزە ئەمنییەکانمان لە سەرجەم ئۆپەراسیۆنەکانیاندا پشتیان بە خودا بەستووە، و لە هەر ئۆپەراسیۆنێکدا سەرکەوتن هاوپەیمانیان دەبێت لە ڕاوەدووڕانی پاشماوەکانی تیرۆر و تێکشکاندنی مۆڵگەکانیان لە هەر شوێنێک بن".