بەدواداچوون - INA
وەزیری بەرگری بەریتانیا، جۆن هیلی، ئەمڕۆ پێنجشەممە دەستلەکارکێشانەوەی خۆی لە پۆستەکەی ڕاگەیاند، بەهۆی ئەوەی کە وەک خۆی دەڵێت ناکۆکی لەگەڵ سەرۆک وەزیران، کییەر ستارمەر، هەیە لەسەر خەرجییەکانی بەرگری.
هیلی نامەی دەستلەکارکێشانەوەکەی لە سۆشیاڵ میدیای (X) بڵاوکردەوە و ڕایگەیاند: "ئەم نامەیە، ئەو نامەیەیە کە هەرگیز پێشبینیم نەدەکرد بینووسم".
لە نامەی دەستلەکارکێشانەوەکەدا هاتووە: "ئەم سەردەمە، پێویستی بە وەبەرهێنانی زیاتر هەبوو لە کەرتی بەرگریدا لە ڕێگەی پلانی وەبەرهێنانی بەرگرییەوە".
هەروەها ئاماژەی بەوەشکردووە: "ئەو کارە حکومییە هاوبەشە نایاب و بەرفراوانەی لە مانگی کانوونی دووەمدا تەواوبوو و سەرپەرشتیمان دەکرد، قەبارەی تەحەددییەکان و زیادبوونی پێداویستییەکانی کەرتی بەرگری دووپاتکردەوە".
لە بەردەوامییدا دەڵێت: "بەڵام ڕێککەوتنی دارایی تایبەت بە پلانی وەبەرهێنانی بەرگری (DIP)ی کییەر ستارمەر، کە بۆ یەکەمجار ڕۆژی دووشەممە بە تەواوی بە دەستم گەیشت، زۆر کەمترە لەوەی کە بۆ بەرگری و بۆ وڵات لەم کاتە مەترسیدارەدا پێویستە".
وتیشی: پشتگیرییە داراییە زیادەکە لە قۆناغە کۆتاییەکاندا دێت، لە کاتێکدا "فشارەکانی سەر ئۆپەراسیۆنەکان و پێویستی بەپەلە بۆ خێراکردنی ئامادەکارییە شەڕکەرییەکان لە دوو ساڵی یەکەمدا چڕدەبنەوە، هەروەها خەرجییەکە تەنها بۆ 2.68%ی کۆی بەرهەمی ناوخۆیی لە ساڵی 2030دا بەرزدەبێتەوە، لە کاتێکدا ساڵی داهاتوو بەو وەبەرهێنانەی کە ئێستا دەیکەین دەگەینە 2.6%".