بەدواداچوون – INA
پۆلیسی باشووری ئەفریقا، ئەمڕۆ چوارشەممە ڕایگەیاند، لە ئەنجامی تەقەکردن لە ڕۆژهەڵاتی شاری جۆهانسبێرگ، لانی کەم ١٢ کەس کوژراون و ٩ کەسی دیکەش بریندار بوون.
پۆلیس لە بەیاننامەیەکدا وتی: چەکدارەکان تەقەیان لە گەڕەکێکی هەژارنشین لە ڕۆژهەڵاتی جۆهانسبێرگ کردووە، کە بووەتە هۆی کوژرانی ١٢ کەس و برینداربوونی نۆ کەسی دیکە.
ڕوونیشیکردەوە کە پڕۆسەیەکی گەڕانی بەرفراوانیان بۆ دۆزینەوەی زیاتر لە ١٠ گومانلێکراو دەستپێکردووە، دوای ئەو هێرشەی کە گەڕەکی 'جامپەرز'ی کردبووە ئامانج.
بەپێی میدیا ناوخۆییەکان، کوژراوەکان بریتین لە نۆ پیاو و سێ ژن، و تا ئێستا هۆکاری سەرەکیی هێرشەکە نەزانراوە.
بە گوتەی پۆلیس، گومانلێکراوەکان بە ئۆتۆمبێلێکی سپی گەیشتوون و لە دوو دەروازەوە چوونەتە ناو گەڕەکەکە، و پێش ئەوەی بە هەمان ئۆتۆمبێل هەڵبێن، لە چەند شوێنێکدا تەقەیان کردووە.