بەغدا - INA
جەنابی مەرجەعی باڵای ئایینی، سەید عەلی حوسەینی سیستانی، ئەمڕۆ پێنجشەممە، سەرەخۆشی خۆی بۆ کۆچی دوایی مەرجەعی ئایینی ئایەتوڵڵا شێخ محەمەد ئیسحاق فەیاز (قدس سره) دەربڕی، و جەختی کردەوە کە لەدەستدانی ئەو خەسارەتێکی قورسە و ئەو بۆشاییەی بەجێیهێشتووە زۆر فراوانە و پڕکردنەوەی سەختە.
مەرجەع سەید سیستانی،لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: بە خەم و پەژارەیەکی زۆرەوە هەواڵی کۆچی دوایی برای دڵسۆزم مەرجەعی ئایینی ئایەتوڵڵا شێخ محەمەد ئیسحاق فەیاز (رەزای خوای لێبێت)م پێگەیشت.
مەرجەعی باڵا زیادی کرد: کۆچکردووی مەزن لە دەیەکانی دواییدا یەکێک بوو لە زانا دیارەکانی حەوزەی زانستی لە نەجەفی ئەشرەف، و بە هەوڵە دڵسۆزانەکانی لە خزمەتکردنی زانست و زاناکان لە بوارەکانی نووسین و وانەوتنەوە و بوارەکانی تردا ناسرابوو، لەبەر ئەوە کۆچی دوایی ئەو خەسارەتێکی قورسە و ئەو بۆشاییەی کە بەجێیهێشتووە فراوانە و پڕکردنەوەی ئەستەمە مەگەر بە لوتف و میهرەبانی خوای گەورە.
سەید سیستانی لە کۆتاییدا وتی: لەکاتێکدا کە بەهۆی ئەم کۆستە گەورەیەوە سەرەخۆشی لە وەلی خوای مەزن (گیانمان فیدای بێت) و حەوزە زانستییەکان و بنەماڵەی کۆچکردووی بەختەوەر و هەموو بڕواداران دەکەم، لە خوای بەرز و توانا داواکارم پلەکەی لە بەهەشتدا بەرز بکاتەوە و لەگەڵ ئەولیاکانی، محەمەد و ئالە پاک و پاکژەکەیدا حەشری بکات، و سەبوری و ئارامی بە کەسوکار و دۆستانی ببەخشێت.