بەدواداچوون - INA
دۆناڵد ترەمپ، سەرۆکی ئەمریکا، ڕەخنەی لە نرخەکانی پلیتی مۆندیالی 2026 گرت و بە زیادەڕۆ وەسفی کردن؛ ئەمەش هەڵوێستێکی چاوەڕواننەکراو بوو کە خستیە بەرەی پێچەوانەی جیانی ئینفانتینۆ، سەرۆکی فیدراسیۆنی نێودەوڵەتی تۆپی پێ (فیفا).
لێدوانەکانی ترەمپ لە کاتی چاوپێکەوتنێکی تەلەفۆنیدا لەگەڵ ڕۆژنامەی New York Post هات، دوای ئەوەی پرسی بەرزبوونەوەی نرخی پلیتەکان ورووژێنرا، کە ئەگەر هەیە بگاتە زیاتر لە 5,000 پاوەندی ستەرلینی بۆ ئەو هاندەرانەی دەیانەوێت شوێنکەوتەی سەرجەم یارییەکانی هەڵبژاردەکەیان بن تاوەکو یاری کۆتایی.
ترەمپ وتی: "من ئاگاداری ئەم ژمارانە نەبووم.. بە ڕاشکاوی، منیش ئەو نرخانە نادەم،" هەروەها وتیشی: "ئەگەر خەڵکی کوینز و برۆکلین و هەموو ئەوانەی دۆناڵد ترەمپیان خۆشدەوێت نەتوانن ئامادەی یارییەکان بن، ئەوا هەست بە نائومێدی دەکەم."
ئەم لێدوانانەی سەرۆکی ئەمریکا لە کاتی کاتێکدایە کە "فیفا" هەوڵدەدات پەیوەندییەکی سەقامگیر لەگەڵ کۆشکی سپی بپارێزێت پێش دەستپێکردنی پاڵەوانێتییەکە لە هاوینی داهاتوو لە وڵاتانی ئەمریکا، کەنەدا و مەکسیک، بەتایبەت لە سایەی ئەو مشتومڕە سیاسییەی پەیوەستە بە بەشداریی هەڵبژاردەی ئێران.
لە لایەن خۆیەوە، ئینفانتینۆ بەرگری لە نرخە بەرزەکان کرد و جەختی کردەوە کە بازاڕی ئەمریکا "گەورەترین و پێشکەوتووترین بازاڕە لە بواری کات بەسەربردن،" ئاماژەی بەوەش کرد کە دووبارە فرۆشتنەوەی پلیتەکان لە بازاڕی ڕەشدا، وای لە فیفا کردووە لە سەرەتاوە نرخەکان بە بەرزی دیاری بکات.
سەرۆکی فیفا ئاماژەی بەوەشکرد کە 25%ی پلیتەکانی قۆناغی کۆمەڵەکان بە کەمتر لە 300 دۆلار بەردەست دەبن، و پێی وابوو ئەم نرخە "ئاساییە" بە بەراورد بە نرخەکانی چالاکییە وەرزشییە گەورەکان لە ناوخۆی ویلایەتە یەکگرتووەکاندا.
هەروەها لێدوانەکانی ئینفانتینۆ مشتومڕی زۆری لێکەوتەوە دوای ئەوەی بە گاڵتەوە وتی کە خۆی "هۆت دۆگ و خواردنەوە گازییەکان" پێشکەشی هەر کەسێک دەکات کە پلیتێکی یاری کۆتایی بە بەهای 2,000,000 دۆلار بکڕێت.
سەرچاوە: ئاژانسەکان