بەغداد – INA
ئەمڕۆ چوارشەممە لە بەغداد، پێکهێنانی "گردبوونەوەی پەرلەمانیی بەغداد بۆ خزمەتگوزاری و کاروباری کۆمەڵایەتی" ڕاگەیەندرا.
لە بەیاننامەیەکی گردبوونەوەکەدا کە بۆ ئاژانسی هەواڵی عێراقی نێردراوە، هاتووە: "لە سۆنگەی بەرپرسیارێتی نیشتمانی و ئەخلاقیمان بەرامبەر کەسوکارمان لە بەغدای پایتەخت، لەگەڵ ژمارەیەک لە ئەندامانی ئەنجومەنی نوێنەرانی پارێزگای بەغداد، دەستپێکردنی پڕۆژە پەرلەمانییە گەنجانە خزمەتگوزارییە کۆمەڵایەتییەکەمان لەژێر ناوی: (گردبوونەوەی پەرلەمانیی بەغداد بۆ خزمەتگوزاری و کاروباری کۆمەڵایەتی) ڕاگەیاند."
ئاماژەی بەوەشکردووە: "گردبوونەوەکە ١٢ پەرلەمانتار لە فراکسیۆن و لایەندارییە سیاسییە جیاوازەکان لەخۆ دەگرێت، کە لە دەوری یەک ئامانج کۆبوونەتەوە ئەویش خزمەتکردنی ڕۆڵەکانی بەغداد و کارکردنی جدییە بۆ چارەسەرکردنی دۆسیە خزمەتگوزاری و بژێوییەکان کە ڕاستەوخۆ پەیوەندییان بە ژیانی هاووڵاتییانەوە هەیە."
جەختیشیکردەوە کە: "ئەم گردبوونەوەیە گوزارشتە لە پڕۆژەیەکی نیشتمانی خزمەتگوزاری سەربەخۆ، بەدوور لە تایفەگەری و مەزهەبگەرایی و هەر ململانێیەکی سیاسی، چونکە ئامانجی یەکخستنی هەوڵە پەرلەمانییەکانە بۆ خزمەتکردنی پایتەخت و کارکردن بە گیانی هاوکاری و بەرپرسیارێتی هاوبەش،" ئاماژەی بەوەشکرد: گردبوونەوەکە کار لەسەر بەدواداچوونی چەند مەلەفێکی گرنگ دەکات، دیارترینیان:
• بەدواداچوونی ڕاستەوخۆ بۆ خەم و داواکارییەکانی هاووڵاتییان.
• کارکردن بۆ جێگیرکردنی گرێبەستەکان لە وەزارەتی پەروەردە و وەزارەتەکانی تر.
• بەدواداچوونی گۆڕینی کرێکارانی ڕۆژانە (الأجراء اليوميين) بۆ گرێبەست.
• بەدواداچوونی مەلەفی پلەبەندی مووچە و بەدیهێنانی دادپەروەری وەزیفی.
• پاڵپشتیکردن و باشکردنی واقیعی خزمەتگوزاری لە بەغداد، بەتایبەت لە بوارەکانی ژێرخانی ئابووری، خزمەتگوزاری تەندروستی و پڕۆژە دواکەوتووەکان.
• چاودێریکردنی ئەدای لایەنە پەیوەندیدارەکان و لێپرسینەوە لە کەمتەرخەمەکان بەپێی یاسا.
• پاڵپشتیکردنی هەر هەوڵێکی نیشتمانی ڕاستگۆ کە بەشدار بێت لە خزمەتکردنی ڕۆڵەکانی پایتەخت.
ئەوەشی خستەڕوو: "ئەم پڕۆژەیە دەبێتە سەرەتایەک بۆ ڕێڕەوێکی بەردەوام لە کارکردنی مەیدانی و پەرلەمانی،" ئاماژەی بەوەشکرد: کە "هەنگاو و ڕێکاری تریش کە لە بەرژەوەندی کەسوکارمان بێت لە بەغداد، لە داهاتوودا ڕادەگەیەنرێن بۆ بەدیهێنانی خواستەکانیان بۆ ژیانێکی شایستە و خزمەتگوزاری باشتر."