بەغداد - INA - ویسام مەلا
وەزیری بازرگانی، ئەسیر غەریری، ئەمڕۆ سێشەممە وردەکاریی ئەپڵیکەیشنی "تاجری ئەلیکترۆنی" ڕوونکردەوە و ئاماژەی بەوە کرد کە ئەپڵیکەیشنەکە ڕێگری دەکات لە فێڵکردن لەو هاووڵاتییانەی دەیانەوێت لە ڕێگەی تۆڕە کۆمەڵایەتییەکانەوە کاڵا بکڕن.
غەریری لە لێدوانێکدا بۆ ئاژانسی هەواڵی عێراقی (INA ) ڕایگەیاند: "ئەپڵیکەیشنی تاجری ئەلیکترۆنی خزمەتگوزارییەکە بۆ ڕێکخستنی بازرگانیی ئەلیکترۆنی لە ڕێگەی دەرکردنی مۆڵەتی بازرگانی و تۆمارکردنی کۆمپانیا بە شێوەی ئەلیکترۆنی."
وتیشی: "چۆن دەتوانرێت چاودێری ئەو کەس و لایەنانە بکرێت کە لە بازرگانیی خەیاڵیدا (فێرچواڵ) لەسەر ئینتەرنێت و تۆڕە کۆمەڵایەتییەکان کاردەکەن و کاڵا دەفرۆشن بەبێ ئەوەی فێڵ لە هاووڵاتی بکرێت؟" هەروەها پرسیاری ئەوەی کرد: "چۆن دەتوانرێت پارێزگاری لە بەرهەمی ڕاستەقینە بکرێت و لەلایەن ساختەکارانەوە قۆرخ نەکرێت؟"
ئاماژەی بەوەش کرد کە "ئەمە لە ڕێگەی سیستەمی بازرگانیی ئەلیکترۆنی و دەرکردنی مۆڵەت بە ڕێکارێکی زۆر سادە بەدی دێت، بۆ ڕێکخستنی کارەکان لەگەڵ کۆمپانیاکانی گەیاندن (تەوصیل) و وەزارەتی پەیوەندییەکان و بانکی ناوەندی، و بەپێی پێویستی بازاڕ و جۆری بازرگانی و گۆڕانکارییەکان پەرەی پێ دەدرێت."
وەزیری بازرگانی ئەوەشی خستە ڕوو کە "بازرگانیی ئەلیکترۆنی هاووڵاتی لە کاڵای ساختە دەپارێزێت، و بازرگانیش دەپارێزێت لەوەی کاڵاکانی لەلایەن لایەنە نادیارەکانەوە ساختە بکرێن، لەگەڵ پاراستنی بازاڕ و خستنە ژێر چاودێری لایەنە چاودێری و یاساییەکان؛ ئەمەش بۆ ڕێکخستنی بازاڕی ئەلیکترۆنییە کە بازاڕێکی گەورەیە و چاوەڕوان دەکرێت گەشەیەکی زۆر بەخۆوە ببینێت."