بەغدا - INA
عەدنان فەیحان دولەیمی، جێگری یەکەمی سەرۆکی ئەنجومەنی نوێنەران، ئەمڕۆ پێنجشەممە جەختی کردەوە کە کەرتی گەشتیاری کۆڵەکەیەکی سەرەکییە لە پاڵپشتیکردنی ئابووریی نیشتمانی و دەرخستنی ناسنامەی ڕۆشنبیریی عێراقدا.
نووسینگەی ڕاگەیاندنی جێگری یەکەمی سەرۆکی ئەنجومەنی نوێنەران لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: عەدنان فەیحان دولەیمی، جێگری یەکەمی سەرۆکی ئەنجومەنی نوێنەران، سەرۆکایەتی کۆبوونەوەیەکی فراوانی لێژنەی ڕۆشنبیری و گەشتیاری و شوێنەوار و ڕاگەیاندنی پەرلەمانی کردووە، بە بەشداریی سەرۆک و ئەندامانی دەستەی گەشتیاری، لەگەڵ نوێنەرانی هۆتێل و چێشتخانە و کۆمپانیا گەشتیارییەکان. فەیحان جەختی کردەوە کە کەرتی گەشتیاری کۆڵەکەیەکی سەرەکییە لە پاڵپشتیکردنی ئابووریی نیشتمانی و دەرخستنی ناسنامەی ڕۆشنبیریی عێراق، هاوکات جەختی لە پێویستی وەبەرهێنانی تواناکانی ئەم کەرتە کردەوە بەپێی دیدگایەکی داڕێژراو کە هاوکار بێت لە بەدیهێنانی گەشەپێدانی بەردەوامدا.
لە کاتی کۆبوونەوەکەدا، فەیحان لێژنەی ڕۆشنبیری و گەشتیاری و شوێنەوار و ڕاگەیاندنی پەرلەمانی ڕاسپارد بۆ ئەنجامدانی وۆرک شۆپێکی فراوان بە ئامادەبوونی دەستەی گەشتیاری و نوێنەرانی سەندیکا و ڕێکخراوە پەیوەندیدارەکان، لە خاوەن هۆتێل و کۆمپانیا گەشتیارییەکان و لایەنە پەیوەندیدارەکان، بە مەبەستی گەیشتن بە ڕاسپاردەی کردەیی کە لەگەڵ پێداویستییەکانی ئەم قۆناغەدا بگونجێت و هاوکار بێت لە بوژانەوەی کەرتی گەشتیاری، هەروەها بڕیاردرا دەرەنجامەکان بە بڕیارێکی پەرلەمانی پەسەند بکرێن بۆ ئەوەی کاریگەرییان زیاتر بێت. هەروەها داوای لە دەستەی گەشتیاری کرد کە هەموو داواکارییەکانی خاوەن هۆتێل و کۆمپانیاکان لە نووسراوێکی فەرمیدا ئاراستەی ئەنجومەنی نوێنەران بکەن، بە مەبەستی بەدواداچوون و گرتنەبەری ڕێکاری پێویست بۆ چارەسەرکردنیان.
فەیحان ئاماژەی بەوەش کرد کە عێراق بە هەمەجۆرییەکی بێوێنە لە شێوازەکانی گەشتیاری جیادەکرێتەوە، کە گەشتیاریی ئایینی، مێژوویی و سروشتی دەگرێتەوە، ئەمەش وای کردووە خاوەن پێکهاتەی ڕاستەقینە بێت بۆ پێشخستنی ئەم کەرتە زیندووە، ڕوونیشیکردەوە کە پەرەپێدانی گەشتیاری پێویستی بە ئاراستەیەکی ڕوون و پاڵپشتییەکی کاریگەری حکومەت هەیە.
جێگری یەکەم دووپاتی کردەوە کە ئەنجومەنی نوێنەران پابەندە بە پاڵپشتیکردنی ئەم کەرتە و کارکردن بۆ بەهێزکردنی هاوبەشی لەگەڵ لایەنە پەیوەندیدارەکان، ئاماژەی بەوەش کرد کە ئەم کۆبوونەوەیە هەنگاوی یەکەمە بەرەو هاوکارییەکی فراوانتر، بە ئامانجی نوێکردنەوەی یاساکان بە جۆرێک کە لەگەڵ گۆڕانکارییەکان بگونجێت، و چارەسەرکردنی ئەو ئاستەنگانەی ڕووبەڕووی کەرتەکە دەبنەوە، بەتایبەتی ئەوانەی پەیوەستن بە وزە و باجەوە