بەغداد- INA
سەرۆکی دەستەی دەروازە سنوورییەکان، ئەمڕۆ سێشەممە، ڕایگەیاند کە ڕۆژی ٢٠ی ئەم مانگە دەروازەی سنووریی ڕەبیعە لەگەڵ سووریا دەکرێتەوە، هاوکات دەستبەکاربوونی کۆمپانیاکانی پشکنینی لە نێوان دەروازە فیدراڵییەکان و دەروازەکانی هەرێم بۆ پشکنینی کاڵاکان پشتڕاستکردەوە.
عومەر وائیلی، سەرۆکی دەستەکە بە ئاژانسی هەواڵی عێراقی (INA)ی ڕاگەیاند: "لە سۆنگەی بنەمای پەیوەندی و تەواوکاری و هەماهەنگی نێوان فەرمانگە کاراکان لە دەروازە سنوورییەکان، دوێنێ لەگەڵ سەرۆکی دەزگای ناوەندیی پێوانەسازی و کۆنتڕۆڵی جۆری کۆبووینەوە بۆ تاوتێکردنی دۆخی کارکردنی کۆمپانیاکانی پشکنین لە دەروازە سنوورییەکان، ئەمەش بۆ دەستەبەرکردنی سەلامەتی ئەو کاڵایانەی هاوردە دەکرێن و شیاون بۆ بەکارهێنانی هاووڵاتییان. هەروەها هەندێک تێبینیمان لەسەر ئەو ئەنجامانە تۆمار کردووە کە ورد نین بۆ ئەوەی ڕێکاری یاساییان بەرامبەر بگرێتەبەر." ئاماژەی بەوەش کرد کە "ئەم هەماهەنگییە لە کۆتاییدا دەبێتە هۆی هاتنەناوەوەی کاڵای شیاو بۆ بەکارهێنان".
وائیلی وتیشی: "ئەم کۆمپانیایانە لە خاڵە گومرگییەکان و بازگەکانی نێوان ئێمە و دەروازەکانی هەرێمیش جێگیرکراون بۆ دڵنیابوون لە پشکنینی مەوادەکان. سیستمێکی حوکمڕانیی ئەلیکترۆنی بۆ بەستنەوەی داتا و ئەنجامەکانی کۆمپانیاکانی پشکنین هەیە، ئەمەش لەپێناو خێرایی و وردی و ڕێگریکردن لە هەر ساختەکاری و دەستکاریکردنێک".
جەختیشی کردەوە کە "تەواوی ئەو کاڵایانەی دێنە ناو عێراق، ملکەچی ڕێکارەکانی پێوانەسازی و کۆنتڕۆڵی جۆرین، بەتایبەت کەرەستە بیناسازییەکان، خۆراک، دەرمان و هەموو ئەو مەوادانەی پەیوەندییان بە ژیانی هاووڵاتییانەوە هەیە. چاودێرییەکی ورد و بەدواداچوونی کەسیی لەلایەن ئێمەوە هەیە بۆ دڵنیابوون لە سەلامەتی کاڵاکان".
سەبارەت بە کردنەوەی دەروازە سنوورییەکان لە ناوچە ڕۆژئاواییەکان، وائیلی وتی: "حکومەت ڕێنمایی داوە بە پێویستی کردنەوەی هەردوو دەروازەی 'وەلید' و 'ڕەبیعە' لەگەڵ سووریا. پێش چەند ڕۆژێک دەروازەی وەلید لە پارێزگای ئەنبار کرایەوە و تانکەرەکانی نەوتی خاو دەستیان بە هەناردەکردن لە عێراقەوە بۆ سووریا کردووە".
وتیشی: "لە ٢٠ی نیسانی ئەمساڵدا، دەروازەی سنووریی ڕەبیعە لە پارێزگای نەینەوا دەکرێتەوە، کە سوودێکی زۆری دەبێت و هەلی کار بۆ گەنجانی ناوچەکە دەڕەخسێنێت. هەروەها لە بوارەکانی ترانزێت، ڕێگەی گەشەپێدان، هاتووچۆی گەشتیاران و ئاڵوگۆڕی بازرگانی و نەوتیش سوودی لێ دەبینرێت".
ئاماژەی بەوەش کرد کە دەستەی دەروازەکان بەپێی ستراتیژ و پلانێکی تۆکمە کار دەکات بۆ ڕووبەڕووبوونەوەی تەحەددییەکانی بەردەم پرۆسەی بازرگانی. هەروەها هەماهەنگییەکی باڵا لە نێوان دەروازەکان و گومرگ و وڵاتانی دراوسێ هەیە و پرۆسەی ئاڵوگۆڕی بازرگانی بە شێوەیەکی ئاسایی بەڕێوەدەچێت.
لە کۆتاییدا ڕایگەیاند: "دەستەی دەروازە سنوورییەکان ٢٤ کاتژمێر کار دەکات بۆ پێشکەشکردنی خزمەتگوزاری بە هاووڵاتییان. لە ڕۆژانی داهاتوودا ئامادەکاری دەکرێت لە دەروازەی 'عەرعەر' بۆ بەڕێکردن و پێشوازیکردن لە حاجیانی عێراق و ناوچەکە کە بە وشکانی گەشت دەکەن." وتیشی "دەروازە سنوورییەکان دەبنە دەروازەیەکی گەشاوە و ئەرێنی بۆ عێراق لەبەردەم وڵاتانی ناوچەکەدا".