بەغداد - INA
حکوومەتی عێراق، ئەمڕۆ چوارشەممە، سەکۆنە و ئیدانەی ئەو هێرشە دڕندانانەی کرد کە سوپای داگیرکەر لە لوبنان ئەنجامی داون، هاوکات هۆشداری دا لە بەردەوامبوونی حکوومەتی قەوارەی ئیسرائیل لەسەر ڕێبازە دوژمنکارییەکەی کە ئامانجی بەردەوامکردنی ململانێ و ئاگرەکانە.
باسم عەوادی، وتەبێژی فەرمیی حکوومەتی عێراق لە بەیاننامەیەکدا کە بۆ ئاژانسی هەواڵی عێراقی ناردووە، دەڵێت: "حکوومەت سەکۆنە و ئیدانەی ئەو هێرشە دڕندانانە دەکات کە سوپای داگیرکەری زایۆنی دژی مەدەنییەکان لە ژمارەیەک شاری لوبنان لەمڕۆ چوارشەممەدا ئەنجامی داون، لەوانەش بەیروتی پایتەخت، کە سەدان شەهید و برینداری لێكەوتوەتەوە".
راشیگەیاند: "بەردەوامبوونی حکوومەتی قەوارەکە لەسەر ڕێبازە دوژمنکارییەکەی بۆ درێژەدان بە ململانێ و ئاگرەکان، سەرەڕای ئەو هەوڵە نێودەوڵەتییە سەختانەی کە بوونە هۆی ڕێکخستنی ڕاگرتنی تەقەکردن، بەڵگەیە لەسەر پلانە دوژمنکارییەکانی بۆ شکستهێنان بە ئاگربەستەکە، هەروەک چۆن بەردەوامبوونی حکوومەتەکەی نەتانیاهۆیە لە ئەنجامدانی تاوانی زیاتر، لە پرۆسەیەکی بەرنامەبۆداڕێژراودا بۆ تێکشکاندنی دوایین بایەخەکانی یاسا نێودەوڵەتییەکان و پێداویستییەکانی ئاشتیی جیهانی".
لە بەردەوامی بەیاننامەکەدا هاتووە: "داوا لە کۆمەڵگەی نێودەوڵەتی و ڕێکخراوە نێودەوڵەتییەکان و دەوڵەتە زلهێزەکان دەکەین، بەرپرسیارێتییەکانی سەر شانیان جێبەجێ بکەن بۆ ڕێگریکردن لە ئەنجامدانی تاوانی زیاتر، و بە هەموو هێزیانەوە هەوڵبدەن بۆ پاراستنی مەدەنییە بێوەییەکان".
لە کۆتاییدا وتی: "سەرەخۆشی لە وڵاتی لوبنانی برا دەکەین، بە حکوومەت و گەلەوە، بۆ قوربانیانی ئەم دەستدرێژییە، و داوا لە خوای گەورە دەکەین شیفای خێرا بۆ برینداران بنێرێت و ئاسایش و سەقامگیری لە سەرجەم وڵاتانی ناوچەکەماندا بەرقەرار بێت"