شەفەق نيوز/ کڵاودیۆ کوردونی جیگر سکرتێر گشتی کلکردەی نەتەوە یەکگرتگەیل ئەرا دەسمیەتیدان عراق "يۆنامی"، ئمڕوو سێشەممە، بەسانن نوسینگەی کلکردەگە لە پارێزگای کەرکوک لە سوو چوارشەممەو راگەیان.
كوردونی لە بەیاننامەیگ رەسیە ئاژانس شەفەق نیوز لە دویای چەوپیکەفتنی وەرد محمد ئیبراهیم حافز سەرۆک ئەنجومەن پارێزگای کەرکوک، راگەیان؛ شاند یۆنامی ئەوەسا سوو نویسنگەی لە کەرکوک بەسێد، لە چوارچیوەی پلانی ئەرا کەمەوکردن نویسنگەیل مەیدانی، وەلێ هەر وەردەوامە لە جیوەجیکردن ئەرکەیلی لە عراق نا کۆتایی ئی ساڵە، و کار کلکردەگە نیەوسێد، و هەماهەنگی وەرد لایەنەیل پەیوەندیدار وەردەوامە ئەرا مسۆگەرکردن تەواوبوین بەرنامە و پڕۆژەیلی.
وتیش: لە دیدارەگە باس سەختیەیل لەڕوی کەرکوک کریا لە ئاست سیاسی و ئیداری و هەڵوژاردن، و هەردوگ لایەن دووپات کردن لەبان گرنگی وەردەوامی پشتگیریکردن نەتەوەیی لە چینەیل حکومڕانی دانار و پشتگیریکردن پڕۆژەیل گەشەپیدان، و قایمکردن ئاشتەوایی کۆمەڵگا و وشەیەکە ناوەین گشت پیکاتەیل کەرکوک.
وتیش: سەرۆک ئەنجومەن پارێزگاگە تەگەرم کوردونی باس شیوەیل پاڵپشتیکردن هاوکاری ناوەین حکومەت ناوخوەیی و کلکردەی یۆنامی، و نووڕستن دویاترین تەقەلایلی لە پشتگیریکردن ئارامی سیاسی ت ئیداری، و دەسمیەتی لە باوەت هەڵوژاردن لە پارێزگاگە.
لە سەرەتای دیدارەگە، حافز سوپاس و رێزگردنی ئەرا ئەو رۆڵە نشان دا کە کلکردەی بۆنامی لە کەرکوک وە درویژایی ساڵەیل گوزەشتە رانیە، وەتایبەت لە باوەتەیل هەڵوژاردن و پاڵپشتیکردن وەیەکەوژیان ئاشتیانە ناوەین پیکاتەیل پارێزگاگە، و دووپات کرد کە کەرکوک رکدارە لە وەردەوامی کارکردن وەرد نەتەوە یەکگرتگەیل لە باوەتەیل گرنگ.
سەرۆک ئەنجومەن باس بڕیگ باوەت مرۆیی گرنگ کرد، لەلییان باوەت ئاوایە عەرەبیە رمیاگەیل، کە شمارەیان رەسێدە 138 ئاوای، و داوا لە نەتەوە یەکگرتگەیل کرد پشتگیری پیشکەش بکەێد ئەرا دووارە ئاوەدانکردن ئی ئاوایەیلە، و مسۆگەرکردن گلەوخواردن خەڵەکیلیان، دووپاتیش لە گرنگی گردەوکردن پشتگیریکردن ناودەوڵەتی ئەرا ئی باوەت ناسکە.