شەفەق نیوز/ وەزارەت تەندروسی، ئمڕوو شەممە، دووپاتکرد لەو زانیاریەیلە رەسیەس ئاژانس شەفەق نیوز، لەباوەت توومارکردن دوو پسای مردن وە بیماری تەوخوین وەربوین لە پارێزگای کەرکوک و ئاشکرایکرد 14 تویشهاتن لە پارێزگا جیاوازەیل توومارکردنە.
قسەکەر وەزارەتەگە سەیف شەدر لە بەیانیگ دەنگی لەبان تووڕەیل راگەیانن وت، "دویاین پسای تویشهاتن وە تەو خوینوەربوین لە سەرەتای ئمسەو تا ئیسە رەسیەس ئەرا 14 پسای چەسپیاگ، وەرد توومارکردن دوو حالەت مردن".
دیاریکرد "یەکەم پسای مردن شەوەکی ئمڕوو لە کەرکوک بوی، دویەمیش کارمەندیگ لە وەزارەت تەندروسی کەرکوک بوی" ئاشکرایکرد "لە زیقار 6 تویشهاتن توومارکریاس لە کەرکوک 4گلە، باوجی لە نەینەوا و موسەنا و بەسرە و رەسافە لە بەغداد هەریەکیان یەک گلە توومارکردنە".