شەفەق نیوز/ مستەفا گەرعاوی ئەندام دەسەی دارایی لە پەرلەمان عراق، ئمڕوو چوارشەممە، هوشداری دا کە هەر سزایگ وەلایەن ئەمریکا لەبان بانکەیل عراق، داواکاری لەبان دۆلار لە بازاڕ ناوخوەیی زیایەو کەێد، و رەخنە لە نەوین پلانیگ حکومەتی ئاشکرا ئەرا سیاسەت پویلی لە وڵات گرد.
گەرعاوی ئەرا ئاژانس شەفەق نیوز وت: هەر سزایگ وەلایەن ئەمریکا لەبان بانکەیل عراق بوودە مدوو کەمەوکردن شمارەی بانکەیل هاوبەش لە پەنجەرەی فرووشتن و سەنین دۆلار، کە داواکارییەیل لەبان دۆلار زیایەو بوود، و کاریگەری لە ئارامی بازاڕ دیرێد.
وتیش: بانک ناوەندی عراق سیستەمیگ کارا و راسگانی خوازێد، وەنە قەیران دۆلار و بانوخوارکردن نرخەگە تا وەخت نادیاریگ وەردەوام بوود.
گەرعاوی دیاری کرد کە حکومەت تا ئیسە نەتوەنست سیاسەتیگ پویلی ئاشکرا دانەێد، و نەتوەنست کۆنتڕۆل نرخ دۆلار لە بازاڕ بکەێد.
وەرجە چەن رووژیگ، زانیاری دەرچگ کە ئەمریکا خوازێد سزای 5 بانک عراقی بەێد، و نەیشت کارت ئەلیکترۆنی لە دەیشت عراق وەکار باێد، وەرجەیەگ بانک ناوەندی عراق بەیاننامەیگ دەرکەێد، لەناوی ئاشکرا بکەێد کە دانوسەنین وەرد واشنتۆن دیرێد، و سزا لەبان بانکەیل نەچەسپیاس.
لەماوەی ساڵ گوزەشتەر ئەمریکا سزا لەبان چەن بانکیگ چەسپان، و بانک ناوەکی جیوەجیی کرد، و سزایان دا وە بیبەشکردنیان لە بەشداریکردن لە زیاکردن دراو، ئەوەیش ئەرا کەمکردن قاچاخی دۆلار وەرەو دەیشت وڵات.