شەفەق نیوز/ سەرچەوەیگ ئەمنی لە بەغداد، ئمڕوو جمعە، خەوەردا لە خوەیکوشتن گەنجیگ لەوەر گیچەڵ خیزانی، و دویەتیگ لەئەنجام رویداویگ هاتوچو گیانی لەدەسدا، و ئەندامیگ ئەمنی وە گولەی هاوڕیەگەی زەخمدار بوین، و لە زیقار کەسیگ وە رویداو هاتوچو گیانی لەدەسدا.
سەرچەوەگە ئەرا ئاژانس شەفەق نیوز وت: گەنجیگ لەداڵگبوی ساڵ 2003 وە پەتیگ لەقەی ژوورەگەی لەناو شوقەیگ لە کۆمەڵگەی بەسمایە باشوور خوەرهەڵات بەغداد خوەی داسە سێدارە.
وتیش: زانیاریەیل ئویشن لە ئەنجام گیچەڵەیل خیزانی خوەی کوشتگە، و تەرمەگەی ئەرا پزشک دادوەری بریا، و لێکۆڵینەوە لە رویداوەگە واز کریا.
سەرچەوەگە وتیش: دویەتیگ لەداڵگبوی ساڵ 2004 گیانی لەدەسدا، لە ئەنجام پلیان ماتووڕسکڵیگ کە براگەی لەداڵگبوی ساڵ 2008 رانیەسەی، لە نزیک گۆڕەپان عبد المحسن لە شار کازميە، وتیش: تەرمەگە ئەرا پزشک دادوەری بریا، و براگەی ئەرا خەسەخانە.
سەرچەوەگە وتیش: ئەندامیگ لە وەزارەت ناوخۆ، تەقە لە ئەندامیگ ترەک کرد، مەوقەی هوچان لە شار شوعلە، کە وە سەختی زەخمدار بوی، و ئەرا خەسەخانە بریا، وتیش: تاوانکارەگە وەرەو شوین نادیاریگ وایە، و وەگورەی زانیارییەیل کێشەی خیزانی ناوەینیان بویە.
لە زیقار، سەرچەوەیگ ئەمنی ئەرا ئاژانس شەفەق نیوز وت: رویداویگ هاتوچو لەبان ری ناوەین قەلعەت سکەر و شار عمارە باکوور پارێزگای زیقار لەناوەین ماشینیگ ساڵۆن و ماتووڕسکڵیگ، کە خاوەن ماشینەگە وە پیچەوانەی ریەگەو رانیە، بویە هوکار مردن رانندەی ئەو ماتووڕسکڵە کە تەمەنی 23 ساڵە.