بەغدا - INA - وسام مەلا
لیژنەی ئاسایش و بەرگریی پەرلەمان، ئەمڕۆ سێشەممە، تەواوکردنی یاسای تاوانەکانی تەکنەلۆجیای زانیاری لەم مانگەدا راگەیاند بەمەبەستی پەسەندکردنی، و جەختیشی کردەوە کە ئامانج لە یاساکە کەمکردنەوەی هەژمارە نەناسراوەکانە، هاوکات ئاماژەی بەوەش کرد کە کار دەکەن بۆ هەموارکردنەوەی ژمارەیەک یاسا لەوانەش یاساکانی هاتووچۆ و بەرگریی ئاسمانی.
ئەندامی لیژنەکە، هاتف زاڵامی ، لە لێدوانێکدا بۆ ئاژانسی هەواڵی عێراقی (INA) ڕایگەیاند: "لیژنەکە ژمارەیەک یاسای لایە کە لە سەردەمی داهاتوودا کار بۆ دەرکردنیان دەکات، لە نێویاندا یاسای بەرەنگاربوونەوەی تاوانەکانی تەکنەلۆجیای زانیاری، کە یەکێکە لە یاسا گرنگەکان و لەم مانگەدا تەواو دەکرێت، بەمەبەستی پێشکەشکردنی بە ئەنجومەنی نوێنەران بۆ پەسەندکردنی".
ڕوونیشیکردەوە کە "یاساکە بۆ دەمکوتکردنی ڕۆژنامەگەری و ڕاگەیاندن نییە، بەڵکو ئامانجی ڕێکخستنی مامەڵەکردنە لەگەڵ تاوانەکانی تەکنەلۆجیای زانیاریدا"، و جەختیشی کردەوە کە "لیژنەکە لەگەڵ دەمکوتکردنی ڕاگەیاندکاران و ڕۆژنامەنووسان نییە، بەڵکو لەگەڵ دیاریکردنی ناسنامەی هەژمار و کەسایەتییە نەناسراوەکانە کە لە ڕێگەی تۆڕە کۆمەڵایەتییەکانەوە چالاکن".
ناوبراو وتیشی "لیژنەکە هەروەها هەمواری یاسای هاتووچۆ و یاسای بەرەنگاربوونەوەی بەرگریی ئاسمانی لایە، لەگەڵ یاسادانانی پەیوەندیدار بە دابینکردنی سیستەمەکانی بەرگریی ئاسمانی، کە ئەمەش بە بابەتێکی گرنگ دادەنرێت بۆ بەهێزکردنی سەروەریی ئاسمانی عێراق".
