نەجەفی ئەشرەف ـ INA - حەیدەر فەرمان
ئەمڕۆ دووشەممە، فڕۆکەخانەی نێودەوڵەتیی نەجەفی ئەشرەف، ڕایگەیاند کە خشتەی گەشتە ئاسمانییەکان لە ئەمڕۆوە دەستی بە هەڵکشان کردووە هاوکات لەگەڵ دەستپێکردنەوەی گەشتی ژمارەیەک کۆمپانیای فڕۆکەوانی لە ڕێگەی فڕۆکەخانەکەوە، لە هەمان کاتدا ئاماژەی بەوە کرد کە لە یەکەمی مانگی سەفەرەوە 274 گەشت و زیاتر لە 62 هەزار گەشتیار تۆمار کراون.
بەڕێوەبەری ڕاگەیاندنی فڕۆکەخانەی نێودەوڵەتیی نەجەفی ئەشرەف، عەممار ئەلتوفەیلی، بۆ ئاژانسی هەواڵی عێراقی (INA) وتی: "فڕۆکەخانەی نێودەوڵەتیی نەجەفی ئەشرەف تەواوبوونی ئامادەکارییەکانی بۆ پێشوازیکردن لەو سەردانیکەرانە ڕاگەیاند کە ڕوو لە پارێزگاکە دەکەن بۆ بەشداریکردن لە سەردانی چلەی ماتەمینیی ئیمام حوسێن (سڵاوی خوای لێبێت)، هاوکات لەگەڵ زیابوونی گەشتە ئاسمانییەکان و دەستپێکردنەوەی ژمارەیەک لەو گەشتانەی بەهۆی ڕووداوەکانی دوایی ناوچەکەوە وەستابوون".
ئەلتوفەیلی ڕوونی کردەوە کە "فڕۆکەخانەکە لەسەرجەم هێڵە جیاوازەکان دەستی بە ئامادەکاریی پێشوەختە کردووە بۆ پێشوازیکردن لە سەردانیکەرانی سەردانی چلەی ماتەمینی، و لە زیاتر لە مانگێکەوە زنجیرەیەک کۆبوونەوە و هەماهەنگیی لەگەڵ دەزگا پاڵپشتیکارەکان، کۆمپانیای ئاسایش و کارمەندانی فڕۆکەخانە ئەنجام داوە، سەرباری هەماهەنگی لەگەڵ مەزارگە پیرۆزەکاندا، بۆ دەستەبەركردنی ئامادەییی تەواو بۆ پێشوازیکردن لە سەردانە ملیۆنییەکە".
جەختیشی کردەوە کە "خشتەی گەشتە ئاسمانییەکان لە ئەمڕۆوە دەستی بە هەڵکشان کردووە، هاوکات لەگەڵ دەستپێکردنەوەی گەشتەکانی ژمارەیەک لە کۆمپانیاکانی فڕۆکەوانی لە ڕێگەی فڕۆکەخانەی نەجەفی ئەشرەفەوە، دوای وەستانیان بەهۆی ئەو ڕووداوانەی ناوچەکە بەخۆیەوەی دیدنی"، و ئاماژەی بە "دەستپێکردنەوەی گەشتەکانی کۆمپانیای فلای دوبەی لە ئەمڕۆدا، و هێڵەکانی ئاسمانیی قەتەری لە دوێنێوە کرد، لەگەڵ گەڕانەوەی گەشتەکانی ژمارەیەک لە کۆمپانیاکانی فڕۆکەوانیی ئێرانی، لە نێویاندا ئێران ئێر تور".
ئاماژەی بەوەشکرد کە "کۆمپانیای عەرەبییە تایبەت بە فڕۆکەوانی بەردەوامە لە ئەنجامدانی گەشتەکانی لە ڕێگەی فڕۆکەخانەی نەجەفی ئەشرەفەوە بۆ شارقە، لە کاتێکدا جووڵەی گەشتیاران ئاسانکاری و ئارامییەکی تەواوی بەخۆیەوە بینیوە"، و ڕوونی کردەوە کە "ئیدارەی فڕۆکەخانەکە ڕێکار و ئاسانکاریی زیاتری بۆ خزمەتکردنی گەشتیاران گرتووەتە بەر، بە تایبەتی بەساڵداچووان، ئافرەتان، منداڵان و خاوەن پێداویستییە تایبەتەکان، و دابینکردنی هۆکار و ئامرازی یارمەتیدەر بۆ گواستنەوەیان و ئاسانکاریی جووڵەیان لە ناو فڕۆکەخانەکەدا".
ئاماژەی بەوەش کرد کە "ژمارەی گەشتە هاتوو و ڕۆیشتووەکان لە ڕێگەی فڕۆکەخانەی نێودەوڵەتیی نەجەفی ئەشرەفەوە، لە یەکەمی مانگی سەفەرەوە تاوەکو دەیەمی مانگەکە، گەیشتووەتە 274 گەشت، لە کاتێکدا ژمارەی گەشتیارانی هاتوو گەیشتووەتە 35 هەزار و 121 گەشتیار، و ژمارەی گەشتیارانی ڕۆیشتووش گەیشتووەتە 27 هەزار و 185 گەشتیار".
