بەغدا ـ INA
ئەمڕۆ دووشەممە، سەرۆکی دەستەی دەستپاکی محەمەد عەلی لامی، جەختی کردەوە لەوەی کە پاراستنی سەرمایەی گەل هێڵی سوورە و یاسا دەیانگرێتەوە کە دەستدرێژیی دەکەنە سەر.
سەرۆکی دەستەکە محەمەد عەلی لامی، لە ڕاگەیەندراوێکدا کە لە کاتی پێشوازیکردنی لە بارەگای دەستەکە لە باڵیۆزی فینلەندا ئانتی پۆتکۆنین دەرچووە و ئاژانسی هەواڵی عێراقی (INA) وەریگرتووە، وتی: "حکومەتی عێراق بەرەنگاربوونەوەی گەندەڵیی خستووەتە پێشەنگی کارنامەی حکومەتەکەی، بە پاڵپشتی و پشتیوانی هەردوو دەسەڵاتی یاسادانان و دادوەری"، جەختیشی کردەوە لەوەی کە "دەستپاکی بە هەنگاوی جدی دەڕوات لە بەدواداچوونی ئەنجامدەرانی تاوانەکانی گەندەڵی، و گەڕاندنەوەی سەرمایە دزراوەکان".
لامی ڕوونی کردەوە کە "ڕووبەڕووبوونەوەی گەندەڵی پێویستی بە شەراکەتێکی نێودەوڵەتیی کاریگەر هەیە"، خواستی خۆشی دەربڕی بۆ "فراوانکردنی هاوکاری لەگەڵ وڵاتانی جیهان بۆ یەکخستنی هەوڵەکان جهت ڕووبەڕووبوونەوەی ئەم دەردە، و فراوانکردنی شەراکەتەکان و پێشکەشکردنی هاوکاریی یاسایی لە پێناو ئاسانکاری بۆ نەهێشتنی کۆسپەکانی گەڕاندنەوەی ئەو سەرمایانەی لە تاوانەکانی گەندەڵییەوە بەدەستهاتوون".
جەختی کردەوە لەوەی کە "بەرەنگاربوونەوەی گەندەڵی بەردی بنچینەیە بۆ دابینکردنی ژینگەیەکی وەبەرهێنانی ئارام و سەرنجڕاکێش"، جەختیشی کردەوە لە "پابەندبوونی دەستەکە بە پاراستنی وەبەرهێنەران و کۆمپانیا بیانییەکان لە بێزارکردن و سەرانەسەندنیان، بە جۆرێک کە ئاستی متۆڕی بە ژینگەی وەبەرهێنان لە عێراق بەرز بکاتەوە و پاڵپشتی جێبەجێکردنی پڕۆژەکانی ئاوەدانکردنەوە و بیناسازی و وەبەرهێنان بکات، و ڕێگەی گەشەپێدانی بەردەوام خۆش بکات".
ئاماژەی بەوەش کرد کە "کاری دەستەکە بەپێی یاسا بەڕێوەدەچێت و ئامانجی پلە و پۆست نییە، بەڵکو پاراستنی سەرمایەی گشتییە، جیاوازی نییە سیفەتی ئەوەی دەستدرێژی دەکاتە سەر سەرمایەی گەل چییە".
هەردوولا بوارەکانی هاوکاریی هاوبەشیان تاوتوێ کرد، بە تایبەتی میکانیزمەکانی ڕێگریکردن لە گەندەڵی و خۆپاراستن لێی و بەرەنگاربوونەوەی، لەوانەش ئەگەری ئیمزاکردنی تێگەیشتنامەیەک لە نێوان دەستەکە و لایەنی هاوتا لە فینلەندا، بۆ ئاڵوگۆڕی ئەزموون و زانیارییەکان، و جێبەجێکردنی بەرنامەی ڕاهێنانی پێشکەوتوو بۆ پەرەپێدانی تواناکانی کارمەندانیان لە بوارەکانی خۆپاراستن لە گەندەڵی و بەرەنگاربوونەوەی، و چەسپاندنی بەهاکانی دەستپاکی.
لە لایەنی خۆیەوە، باڵیۆزی فینلەندا ئامادەیی و ئاستی هەوڵەکانی عێراقی بەرز نرخاند لە بەرەنگاربوونەوەی گەندەڵیدا، و جەختی کردەوە لەوەی کە "ئیرادەیەکی عێراقیی ڕاستگۆیانە و جدیی هەست پێکردووە لەم دۆسیەیەدا".
باڵیۆز ئومێدی خۆی دەربڕی کە "عێراق پێگەیەکی پێشکەوتوو بەدەستبهێنێت لە بواری ڕێگریکردن لە گەندەڵی و بەرەنگاربوونەوەیدا"، و ئامادەیی خۆی نیشاندا بۆ ئیمزاکردنی تێگەیشتنامەیەک لە نێوان دەستەکە و لایەنی هاوتا لە فینلەندا.
