بەغداد – INA
کۆمپانیای گشتیی ئاسن و پۆڵا، کە یەکێکە لە دامەزراوەکانی وەزارەتی پیشەسازی، ئەمڕۆ پێنجشەممە، ئامادەیی خۆی ڕاگەیاند بۆ پڕکردنەوەی پێداویستیی ناوخۆ لە "شیشی بیناسازی" و هەناردەکردنی بۆ دەرەوەی وڵات.
کۆمپانیاکە لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە، ئاماژەی بەوە کردووە: "کۆمپانیای گشتیی ئاسن و پۆڵا لە پارێزگای بەسرە، ئامادەیی تەواوی هەیە بۆ دابینکردنی پێداویستیی فەرمانگە حکومییەکان و کۆمپانیاکانی کەرتی تایبەت لە شیشی بیناسازی، کە بەپێی ستانداردە جیهانییەکان و بە قەبارە جیاوازەکان (لە ٨ ملم بۆ ٣٢ ملم) بەرهەم دەهێنرێت."
عەباس محەمەد سەیھود، بەڕێوەبەری گشتیی کۆمپانیاکە، لە ڕاگەیەندراوەکەدا جەختی لەوە کردووەتەوە: "کۆمپانیاکە ئامادەیە بۆ دابینکردنی پێداویستییەکانی بازاڕی ناوخۆ و هەناردەکردن بۆ دەرەوەی عێراق." ئاماژەی بەوەش کردووە کە کۆمپانیاکەیان یەکێکە لە دێرینترین کۆمپانیا پیشەسازییەکان لە عێراق و ناوچەکەدا و خاوەنی ئەزموونێکی زۆرە، هەروەها کارگەکانیان نوێکراونەتەوە تاوەکو لەگەڵ نوێترین تەکنەلۆژیا و پێشکەوتنی جیهانی لەم بوارەدا بگونجێن.
