بەغداد – INA
ئەنجومەنی باڵای دادوەری، ئەمڕۆ پێنجشەممە، ڕایگەیاند کە بڕی ٢٥ ملیار دیناری دیکە لە چوارچێوەی دۆسیەی عەدنان جومەیلی، بریکاری وەزارەتی نەوت بۆ کاروباری پاڵاوتن، دەستی بەسەردا گیراوە.
زیا جەعفەر، دادوەری لێکۆڵینەوە لە دادگای کەرخ، لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: "لە چوارچێوەی لێکۆڵینەوە بەردەوامەکان لە دۆسیەی تۆمەتباری دەستبەسەرکراو (عەدنان جومەیلی)، توانراوە بڕێکی دیکە لە پارە و داهاتی شاراوە بدۆزرێتەوە و دەستی بەسەردا بگیرێت."
دادوەرەکە ڕوونیکردەوە: "بەشێک لەو پارانە لای چەند کەسێک وەک ئەمانەت دانرابوون، بەشەکەی دیکەشی لەناو دیواری چەند خانووێکدا شاردرابوونەوە؛ کۆی گشتی ئەو بڕە پارەیەی لەم پڕۆسەیەدا دەستی بەسەردا گیراوە بریتییە لە ٢٥ ملیار دیناری عێراقی و ٢٠٠ هەزار دۆلاری ئەمریکی، جگە لە ٤ کیلۆگرام لە زێڕ ."
لە کۆتایی ڕاگەیەندراوەکەدا ئاماژە بەوە دراوە کە لێکۆڵینەوەکان لە دۆسیەی تۆمەتباری ناوبراو هێشتا بەردەوامن، وەک بەشێک لە ڕێکارەکانی بەدواداچوون بۆ داهاتە دەستکەوتووەکانی تاوانەکە و دەستنیشانکردنی سەرجەم ئەو کەسانەی کە تێوەگلاون.
