زیقار – INA – زەهرا سەباح
ئەمڕۆ دووشەممە، پارێزگای زیقار، وردەکارییەکانی پلانی خزمەتگوزاریی خۆی تایبەت بە زیارەتی چلەی ماتەمینی ڕاگەیاند، هاوکات چوار تهوهری بۆ بڵاوەپێکردنی ئامێرەکانی شارەوانی لە ماوەی زیارەتەکەدا دیاری کرد.
پارێزگاری زیقار، هێشام حەمدانی، بە ئاژانسی هەواڵی عێراقی (INA)ی ڕایگەیاند: "پارێزگاکە لە ئامادەباشیی تەواودایە بۆ پێشوازیکردن لەو زیارەتکارانەی کە لە پارێزگای بەسرە، کۆماری ئیسلامیی ئێران و وڵاتانی دراوسێوە دێن و بە ئاڕاستەی کەربەلای پیرۆز تێپەڕ دەبن"، ڕوونیشی کردەوە کە "هەوڵێکی چڕوپڕ لەلایەن فەرمانگە خزمەتگوزارییەکانی پارێزگاکە لە قەزا و ناحیەکانیدا لە ماوەی بەڕێوەچوونی ئەم ڕێپێوانە ملیۆنییەدا دەدرێت".
ئاماژەی بەوەشکرد: "پلانێکمان بۆ زیارەتی چلەی ماتەمینی داناوە و لەگەڵ سەرجەم لایەنە پەیوەندیدارەکان و فەرمانگە خزمەتگوزارییەکاندا تاووتوێمان کردووە، کار دەکەین بۆ دابینکردنی سەرجەم پێداویستییەکانی زیارەتکاران و دەستەبەرکردنی ئاسایش و ئارامی"، داواشی لە خاوەن موکەبەکانی حوسێنی و زیارەتکاران کرد هاوکاریی لایەنە ئەمنییەکان و فەرمانگە خزمەتگوزارییەکان بکەن بۆ پێشکەشکردنی باشترین خزمەتگوزاری پێیان.
تیشکی خستە سەر ئەوەش کە "ئەو ڕێگا خێرایەی کە هەندێک لە زیارەتکاران بەکاریدەهێنن، پاراستنی تەواوی بۆ دابینکراوە لەلایەن بەڕێوەبەرایەتیی پاراستنی ڕێگاکانەوە، هەروەها بەڕێوەبەرایەتیی بەرگریی شارستانی و چەند بەڕێوەبەرایەتییەکی دیکەمان بەشدار پێکردووە بۆ دابینکردنی پاراستنی پێویست بۆ زیارەتکاران لە سنووری زیقار لەگەڵ بەسرەوە تاوەکو سنووری زیقار لەگەڵ موسەننا"، ڕوونیشی کردەوە کە "دوای دوو ڕۆژی دیکە کۆبوونەوەیەک بۆ ژووری ئۆپەراسیۆنەکان بە ئامادەبوونی سەرجەم فەرمانگە خزمەتگوزارییەکانی پارێزگای زیقار سازدەکرێت، ئەمەش بە بەشدارپێکردنی کۆمپانیا نەوتییەکان، فەرمانگە خزمەتگوزاری و ناخزمەتگوزارییەکان و بەڕێوەبەرایەتییە گشتییەکان، بۆ پێشکەشکردنی باشترین خزمەتگوزاری بە زیارەتکاران و خاوەن موکەبەکان".
لەلایەنی خۆیەوە، بەڕێوەبەری شارەوانییەکانی زیقار، حەیدەر موحسین، بۆ ئاژانسی هەواڵی عێراقی (INA) جەختی کردەوە کە "بەڕێوەبەرایەتیی شارەوانییەکانی زیقار، لەسەر بنەمای ڕێنماییەکانی حکومەتی خۆجێیی لە پارێزگای زیقار، پلانی خزمەتگوزاریی تایبەت بە زیارەتی چلەی ماتەمینی ئامادە کردووە، کە پلانەکە لەلایەن بەڕێوەبەرایەتییەکەوە لە ڕێگەی چوار تەوەرەوە جێبەجێ دەکرێت:
تەوەری یەکەم: خاڵی بەیەکگەیشتنی پارێزگای زیقار بە پارێزگای بەسرە، کە لە شاری چەبایشەوە دەستپێدەکات.
تەوەری دووەم: باکووری زیقار، لە قەزای فەجەرەوە تاوەکو دەگاتە سنووری پارێزگای دیوانییە.
تەوەری سێیەم: لە ناوچەی تارهوە دەستپێدەکات بۆ قەزای سووق ئەلشیووخ.
تەوەری چوارەم: ناوچەی بەتحا لە خاڵی بەیەکگەیشتنی پارێزگای زیقار بە پارێزگای موسەننا.
ئاماژەی بەوەشکرد کە "ئامێرەکانی بەڕێوەبەرایەتیی شارەوانییەکانی زیقار لەسەر درێژایی ئەم تەوەرانە بڵاودەبنەوە، کە تێیدا کارەکانی پاککردنەوە جێبەجێ دەکەن، سەرەڕای پاڵپشتیکردنی فەرمانگەی ئاو لە ڕێگەی دابینکردنی تانکەری ئاو بۆ موکەبە حوسێنییەکان، و ئێمە لە پەیوەندی بەردەوامداین لەگەڵ بەڕێوەبەرایەتییەکانی شارەوانیدا بۆ پێشکەشکردنی خزمەتگوزاری بە موکەبە حوسێنییەکان و بە درێژایی 24 کاتژمێر کار دەکەین".
لەکاتێکدا بەڕێوەبەری بەشی ئۆپەراسیۆنەکان و تەندروستیی فریاکەوتن لە زیقار، موحسین عەلی، بۆ ئاژانسی هەواڵی عێراقی (INA) ئاماژەی بەوە کرد کە "فەرمانگەی تەندروستیی زیقار پلانێکی بۆ پاڵپشتیی پزیشکی بۆ زیارەتی چلەی ماتەمینی ئیمام حوسێن (سڵاوی خوای لێبێت) داناوە، ئەمەش لە ڕێگەی پێکهێنانی سەنتەری پزیشکیی تایبەت بە پێشکەشکردنی خزمەتگوزاریی پزیشکی و چارەسەری بۆ زیارەتکاران و بڵاوەپێکردنیان لەسەر درێژایی تەوەرەکانی هاتوچۆیان، سەرەڕای بڵاوەپێکردنی ئۆتۆمبێلەکانی فریاکەوتنی خێرا بۆ دەستێوەردان لە حاڵەتە کتوپڕەکاندا، و جێبەجێکردنی هەڵمەتەکانی هۆشیاریی تەندروستی لەلایەن بەشی تەندروستیی گشتییەوە بۆ ڕێگریکردن لە بڵاوبوونەوەی نەخۆشییە پەتاکان".
ئەوەشی خستە ڕوو کە "بەشی دەرمانسازی، دەرمان و پێداویستییە پزیشکییەکانی بۆ مەفرەزە تەندروستییەکان ئامادە کردووە بۆ پێشکەشکردنیان بە زیارەتکاران، لەپاڵ ئامادەکردنی بانکەکانی خوێن و بەشەکانی فریاکەوتن لە نەخۆشخانەکاندا بۆ کارکردن بە درێژایی 24 کاتژمێر، ئەمەش لە پێناو جێبەجێکردنی ئەو پلانەی کە لەلایەن فەرمانگەی تەندروستیی زیقارەوە ئامادەکراوە".
