بەغدا - INA - ئامەنە سەلامی
ئەمڕۆ دووشەممە، وەزارەتی نەوت، جەختی لە بەردەوامبوون لە جێبەجێکردنی پلانی هەمەجۆرکردنی دەروازەکانی هەناردەکردنی نەوتی خاو کردەوە، هاوكات ئاماژەی بەوەشکرد کە پڕۆژەی دروستکردنی بۆرییەک بەرەو بانیاس لە نێو ئەو پڕۆژانەدایە کە لە ئێستادا لەژێر توێژینەوەدان.
گوتەبێژی فەرمیی وەزارەتەکە، سەلیم رکابی، بە ئاژانسی هەواڵی عێراقی (INA)ی ڕاگەیاند: "وەزارەتی نەوت بەردەوامە لە کارکردن لەسەر پلانی هەمەجۆرکردنی دەروازەکانی هەناردەکردن و دابینکردنی نەرمیى پێویست بۆ هەناردەکردنی نەوتی خاوی عێراق"، و ڕوونی کردەوە کە "لە نێو ئەو پڕۆژانەی لە ئێستادا توێژینەوەیان لەسەر دەکرێت، دروستکردنی بۆرییەکە بەرەو بانیاس".
ئاماژەی بەوەشکرد کە "ڕاسپاردەیەک لە دانیشتنی کۆتایی ئەنجومەنی وەزیراندا دەرچووە کە بڕیاری واژۆکردنی ڕێککەوتننامەیەکی بنەما سەرەتاییەکان و یاداشتنامەیەکی نهێنیپارێزیی زانیارییەکان لەگەڵ هاوپەیمانێتییەکی ئەمریکی-قەتەری دەدات؛ بە ئامانجی ئامادەکردنی توێژینەوە تەکنیکییەکان و نەخشەکانی تایبەت بە پڕۆژەکە".
ڕوونیشی کردەوە کە "ڕێککەوتننامەکە هیچ پابەندییەکی دارایی یان گرێبەستی ناخاتە سەر وەزارەتی نەوت، و ئەمە تەنیا لە چوارچێوەی قۆناغی ئامادەکردنی توێژینەوە تەکنیکییەکان دێت بۆ پڕۆژەکە".
