بەغدا – INA – محەمەد تاڵبی
وەزارەتی کار و کاروباری کۆمەڵایەتی، ئەمڕۆ پێنجشەممە، ڕایگەیاند کە لە ئاییندەیەکی نزیکدا قۆناغی دووەمی پڕۆژەی پلاتفۆرمی "پیشەکان" (مهن) کارا دەکرێت، کە ئەم قۆناغە تەنها کرێکارانی عێراقی دەگرێتەوە. هاوکات وەزارەت ئاشکرای کرد کە توانیویانە ٣٠ پڕۆگرامی مەشق و ڕاهێنانی پیشەیی نوێ بکەنەوە.
ئوسامە مەجید، بەڕێوەبەری گشتیی کار و ڕاهێنان لە وەزارەتی کار، لە لێدوانێکی تایبەتدا بۆ ئاژانسی هەواڵی عێراقی (INA) ڕایگەیاند: "قۆناغی دووەمی پلاتفۆرمەکە بریتییە لە بەستنەوەی ڕاستەوخۆی ئەو کەسانەی بەدوای کاردا دەگەڕێن لە کەرتی تایبەت لەگەڵ خاوەنکارەکان. ئەمەش دوای سەرکەوتنی قۆناغی یەکەم دێت، بڕیاریشە لە قۆناغەکانی سێیەم و چوارەمدا پێوەر و مەرجی ورد بۆ کارکردنی کرێکارانی بیانی دابنرێت."
بەڕێوەبەری گشتی ئاماژەی بەوە کرد کە خاوەنکار و کۆمپانیاکان پابەند دەکرێن بەوەی پێش ئەوەی داوای هێنانی کرێکاری بیانی بکەن، دەبێت هەلی کارە چۆڵەکانیان لە پلاتفۆرمی "پیشەکان"دا بڵاوبکەنەوە. وتیشی کە بنکەی زانیارییەکانیان بە هاوکاریی ڕێکخراوی (GIZ) نوێ کراوەتەوە و زیاتر لە ملیۆنێک کەسی تێدا تۆمار کراوە.
ئوسامە مەجید جەختی کردەوە کە دەوڵەت بە توندی ڕوو لە پشتیوانیکردنی کەرتی تایبەتە، بەتایبەت دوای دەرچوونی یاسای خانەنشینی و دەستەبەری کۆمەڵایەتی (ژمارە ١٨ی ساڵی ٢٠٢٣)، کە هەمان ئیمتیازات و مافەکانی فەرمانبەری حکومی بە کارمەندانی کەرتی تایبەت دەبەخشێت.
لە لایەکی دیکەوە، مەجید ئاشکرای کرد کە وەزارەت لە ساڵی ٢٠٢٥دا بە هەماهەنگی لەگەڵ ڕێکخراوی "یونسکۆ" توانیویەتی ٣٠ پڕۆگرامی مەشق و ڕاهێنان دابڕێژێتەوە کە لەگەڵ پێداویستییەکانی بازاڕدا دەگونجێن. هەروەها ڕایگەیاند کە کارەکانی بونیادنانی "سەنتەری عێراقی - کۆری" بە هاوکاریی ڕێکخراوی "کۆیکا" لە قۆناغی کۆتاییدایە. ئەم سەنتەرە دەبێتە گەورەترین ناوەندی ڕاهێنان لە وڵاتدا و وۆرکشوپی مۆدێرنی وەک چاککردنەوەی ئەسانسۆر و ئۆتۆمبێلە نوێیەکانی تێدا دەبێت.
