بەغدا - ویسام مەلا
ئەمڕۆ شەممە كلیمێنس سیمێتنەر باڵیۆزی یەكێتی ئەوروپا لە عێراق دووپاتیكردەوە بەرەنگاربوونەوەی گەندەڵی لە پێشینەی كارەكانی حكومەتی عێراقە، ئامادەیی یەكێتیی ئەورووپای دووپاتكردەوە بۆ پاڵپشتیكردنی هەوڵەكانی عێراق لە وەرگرتنەوەی پارە و سەروەت و سامان و بەهێزكردنی سەروەری یاسا، هەروەها دەستخۆشی لە هەوڵەكانی دەسەڵاتی دادوەری و حكومەتی كرد لە بەرەنگاربوونەوەی گەندەڵیدا.
لە میانەی دەستپێكردنی ڕاپۆرتی بەرنامەی بەدواداچوونی داواكاری گشتی، كە پەیامنێری ئاژانسی هەواڵی عێراقی (INA) ئامادەی بوو، سیمێتنەر ڕایگەیاند : هەوڵەكانی بەرنامەی نەتەوە یەكگرتووەكان بۆ پەرەپێدان (UNDP) بەرز دەنرخێنین بۆ پابەندبوونی بەردەوامی بەم كارە گرنگە، كە ڕەنگدانەوەی ئیرادەیەكی هاوبەشە بۆ بەهێزكردنی حوكمڕانی، چەسپاندنی یەكپارچەیی دامەزراوەیی، و پاراستنی سامانی گشتی بە شێوەیەك كە خزمەت بە بەرژەوەندییەكانی عێراق بكات هاوڵاتیان.
ئاماژەی بەوەشكرد : ئەو ڕاپۆرتە لە كاتێكی چارەنووسسازدا دێت، عەلی زەیدی سەرۆك وەزیرانیش بە ڕوونی دووپاتی كردەوە كە بەرەنگاربوونەوەی گەندەڵی لە پێشەنگی ئەولەویەتەكانی حكومەتەكەیدایە، ئاماژەی بەوەشكرد، یەكێتی ئەوروپا لەڕێگەی هاوبەشی لەگەڵ بەرنامەی نەتەوە یەكگرتووەكان بۆ پەرەپێدان لە چوارچێوەی پڕۆژەی 'دەستپێشخەرییەكانی دژە گەندەڵی و ناوبژیوانی بۆ دادپەروەری ژینگەیی' پشتگیری لەم هەوڵانە دەكات، كە بەشدارە لە دروستكردنی ژینگەیەكی لەبار بۆ وەبەرهێنان و گەشەی ئابووری.
ڕوونیشیكردەوە : كە هەوڵەكان تەنها لە چاودێریكردنی دادگاییكردنەكاندا سنوردار نین، بەڵكو پاڵپشتیكردنی پەرەپێدانی یاسادانان و چارەسەركردنی ناكۆكییە بازرگانییەكان و ناوبژیوانی و بەرەوپێشبردنی دادپەروەری ژینگەیی و ئەنجامدانی گفتوگۆیەكی فراوانتر لەسەر حوكمڕانی، جەختیشیكردەوە كە دەبێت دامەزراوەكان باوەڕپێكراو بن، یاساكان بە بەردەوامی جێبەجێ بكرێن، هەروەها دەسەڵاتی گشتی بۆ خزمەتكردنی بەرژەوەندی گشتی بەكاربهێنرێت.
ئاماژەی بەوەشكرد : حوكمڕانی باش و سەروەری یاسا دوو پایەی بنەڕەتین بۆ بنیاتنانی متمانەی هاووڵاتیان و پشتیوانیكردن لە هەمەچەشنكردنی ئابووری و گەیشتن بە گەشەپێدانی بەردەوام.
سیمتنەر جەختی لەوە كردەوە : كە دادپەروەری لە دۆسیە گەورەكانی گەندەڵیدا تەنها بە سزادان ناپێورێت، بەڵكو بەو ڕادەیەی كە سەرچاوە گشتیەكان وەرگیراونەتەوە و دەگەڕێندرێنەوە بۆ دەوڵەت، ئاماژەی بەوەشكردووە ڕاپۆرتەكە داوای گرتنەبەری ڕێبازێكی گشتگیرتر دەكات كە لە دەستنیشانكردنی زیانە داراییەكان و بەدواداچوون و دەستەبەركردنی سەروەت و سامانەوە درێژدەبێتەوە بۆ جێبەجێكردنی قەرەبووكردنەوە، لەنێویاندا قەرەبووكردنەوەی سنوور بەزاندن لەكاتی پێویستدا.
ڕوونیشیكردەوە : وەرگرتنەوەی سەروەت و سامان لێپرسینەوەی یاسایی بە ئەنجامە بەرجەستەكراوەكانەوە دەبەستێتەوە، دڵنیابوون لە لێپێچینەوە لە داهاتی گەندەڵی و چارەسەركردنی دەرئەنجامە كردارییەكانی، ئاماژەی بەوەشكرد، عێراق خاوەنی ئامرازە یاساییە پێویستەكان و چوارچێوەی دامەزراوەییە بۆ بەدیهێنانی ئەمە و ئەولەویەت لە بەكارهێنانی بەردەوام و لە كاتی خۆیدا و هەماهەنگی ئەم ئامرازانەدایە لە نێوان دامەزراوە پەیوەندیدارەكاندا.
ڕوونیكردەوە : كە ڕاپۆرتەكە ڕاسپاردەی پراكتیكی لەخۆدەگرێت بۆ بەرزكردنەوەی وەرگرتنەوەی سەروەت و سامان، لەوانە بەهێزكردنی هەماهەنگی دامەزراوەیی، بەرزكردنەوەی پەیوەندی نێوان ڕێوشوێنە تاوانكاری و مەدەنییەكان، باشتركردنی میكانیزمەكانی پاراستنی سەروەت و سامان و فراوانكردنی بەكارهێنانی ئامرازە یاسایی و تەكنیكییەكان.
دووپاتی كردەوە : كە یەكێتی ئەوروپا ئامادەیە پاڵپشتی عێراق بكات لە قۆناغە جیاجیاكانی ئەم پرۆسەیەدا بە بنیاتنانی توانای یاسایی لەناو دامەزراوە گشتییەكان، پەرەپێدانی سیستەمی بەڕێوەبردنی كەیس و داتا، بەهێزكردنی هەماهەنگی دامەزراوەیی، پاڵپشتیكردنی هاریكاری نێودەوڵەتی لەسەر پرسەكانی سنوور بەزاندن، و بەردەوامبوونی گفتوگۆی یاسایی و سیاسی بەپێی ستانداردە نێودەوڵەتییەكان.
سیمتنەر ستایشی ئەنجوومەنی باڵای دادوەری و حكومەتی عێراق و هەموو دامەزراوە نیشتمانییەكانی كرد و ستایشی ڕۆڵ و سەركردایەتیكردن و هاوكاری بەردەوامیان لە پێشخستنی هەوڵەكانی دژە گەندەڵی كرد.
