ئەنبار- INA - ئەحمەد دلێمی
ئەمڕۆ دووشەممە، پشکێنەری شوێنەوار و کەلەپووری ئەنبار، پێکهێنانی لیژنەیەکی سیانی بۆ ڕزگارکردنی منارەی فاروق لە شارۆچکەی هیت لە مەترسیی ڕووخان ڕاگەیاند.
پشکێنەری شوێنەوار و کەلەپووری ئەنبار، عەممار عەلی حەمدی، بە ئاژانسی هەواڵی عێراقی (INA)ی ڕاگەیاند: منارەی فاروق یەکێکە لە کۆنترین و گرنگترین شوێنەوارە مێژووییەکان، ڕوونیشی کردەوە کە بنەڕەتی ئەم شوێنەوارە تاوەرێکی چاودێری بووە لەسەر کەنارەکانی ڕووباری فوڕات، پێش ئەوەی دوای فتوحاتە ئیسلامییەکان لە ساڵی 16ی کۆچیدا و لە سەردەمی خەلیفە عومەری کوڕی خەتتابدا مزگەوتێکی بچووکی پێوە بلکێندرێت، و دواتر بە منارەی فاروق ناوزەد کرا.
ئاماژەی بەوەشکرد کە: منارەکە تاوەکو ئێستاش بە پێوە ماوە،هەروەها ئاماژەی بەوەشکرد کە دوایین کاری نۆژەنکردنەوە کە بەخۆیەوە بینیویەتی لە ساڵی 1945دا بووە، کە لەو کاتەدا لە لایەن دانیشتووانی ناوچەکە و خۆبەخشانەوە بە شێوازی ناوزانستی ئەنجامدراوە، بە مەبەستی پاراستنی جەستەی منارەکە و دیوارە دەرەکییەکانی.
حەمدی ڕوونی کردەوە: منارەکە لە ئێستادا بەدەست لارییەکەوە لە بنکەکەیدا دەناڵێنێت بەهۆی هەڵکەوتنی لەسەر لێواری قەڵای هیت، سەرەڕای کاریگەریی ئەو خاکەی دەوروبەری کە بەهۆی سروشتە قوڕییەکەی و کێشەکانی ئاوەڕۆی تایبەت بە مزگەوتەکە و خانووە هاوسێکان بەشدار بووە لەم دۆخەدا.
ئاماژەی بەوەشکرد: پارێزگاری ئەنبار، عومەر مەشعان دەبووس، ڕێنمایی داوە بە گرتنەئەستۆی پڕۆژەی نۆژەنکردنەوەی منارەکە لەسەر تێچووی دیوانی پارێزگا، و پێکهێنانی لیژنەیەکی سیانی کە پشکێنەری شوێنەواری ئەنبار، بەڕێوەبەرایەتیی وەقفی سوننی و بەشی ئەندازیاری لە پارێزگا لەخۆدەگرێت، لە پاڵ سوودوەرگرتن لە نووسینگەیەکی ڕاوێژکاری بۆ ئامادەکردنی لێکۆڵینەوە هۆنەرییە پێویستەکان و دیاریکردنی چارەسەرە داواکراوەکان.
ئەوەشی خستەڕوو: کارەکانی نۆژەنکردنەوە لەژێر سەرپەرشتیی پشکێنەری شوێنەواری ئەنبار و بە پاڵپشتیی دارایی دیوانی پارێزگا بەڕێوەدەچن، تیشکی خستە سەر ئەوەی کە لیژنەکە دەستی بە کارەکانی کردووە و لە چاوەڕوانی تەواوبوونی ڕاپۆرتە هۆنەرییەکان و لێکۆڵینەوە ڕاوێژکارییەکان دایە، وەک ئامادەکارییەک بۆ سپاردنی پڕۆژەکە بە کۆمپانیایەکی پسپۆڕ لە بواری نۆژەنکردنەوە و ڕاگرتنی باڵەخانە و شوێنەوارە بەرزەکان، بە مەبەستی پاراستنی ئەم کەلەپوورە مێژووییە لە مەترسیی ڕووخان.
