بەغداد – INA – ئامنە سەلامی
وەزارەتی کار و کاروباری کۆمەڵایەتی، ئەمڕۆ هەینی، ڕایگەیاند کە ٣٨٨ هەزار کەس لە مووچەی بەخێوکەری تەرخانکراو لە بەغداد و پارێزگاکان سوودمەند بوون، هاوکات جەختیشی کردەوە کە دامەزراندن لە چوارچێوەی ڕێژەی ٥٪ی دیاریکراو بۆ خاوەن پێداویستییە تایبەتەکان لە ئێستادا ڕاگیراوە تا ئەو کاتەی یاسای بودجەی گشتیی دەوڵەت پەسەند دەکرێت.
زیکرا عەبدولڕەحیم، سەرۆکی دەستەی مافەکانی خاوەن پێداویستییە تایبەتەکان لە وەزارەتەکە، بە ئاژانسی هەواڵی عێراقی (INA)ی ڕاگەیاند: "ژمارەی سوودمەندبووان لە مووچەی بەخێوکەری تەرخانکراو گەیشتووەتە (٣٨٨,٠٠٠) سوودمەند لە بەغداد و پارێزگاکان".
ڕوونیشیکردەوە کە "ڕێژەی (٥٪)ی تەرخانکراو بۆ خاوەن پێداویستییە تایبەتەکان کە لە یاسای مافەکانی خاوەن پێداویستییە تایبەتەکان ژمارە (٣٨)ی ساڵی ٢٠١٣ی هەموارکراودا هاتووە، لە ڕێگەی پلە وەزیفییەکان لەسەر میلاکی هەمیشەیی یان ئەو گرێبەستانەوە جێبەجێ دەکرێت کە لەلایەن دامەزراوەکانی دەوڵەت و لایەنە حکومییەکانەوە ڕادەگەیەنرێن، هەروەها لە ڕێگەی ئەو دامەزراندنانەی کە ئەنجومەنی ڕاژەی گشتیی فیدراڵی ڕایان دەگەیەنێت".
وتیشی "لە ئێستادا هیچ دامەزراندنێکی نوێ لە چوارچێوەی ئەم ڕێژەیەدا نییە بەهۆی پەسەندنەکردنی بودجەی گشتیی دەوڵەت، لەبەر ئەوەش هیچ پلەیەکی وەزیفی نوێ ڕانەگەیەنراوە کە بشێت پشتی پێ ببەسترێت بۆ گرتنەوەی بە دامەزراندن".
وتیشی: "کردنەوەی دەرگای ناونووسینی نوێ بۆ مووچەی بەخێوکەری تەرخانکراو، بەستراوەتەوە بە قەبارەی ئەو تەرخانکردنە داراییانەی کە لە ناو بودجەی گشتیی فیدراڵی بۆ ساڵی ٢٠٢٦ جێگیر دەکرێن، و بەو بڕە پارەیەی کە وەزارەتی دارایی بۆ ئەم مەبەستە تەرخانی دەکات".
جەختیشی کردەوە: "هیچ ژمارەیەکی دیاریکراو نییە بۆ گرتنەوەیان بە مووچەی بەخێوکەری تەرخانکراو کە لەم ماوەیەی ئێستادا بە فەرمی ڕابگەیەنرێت، چونکە ئەم بابەتە گرێدراوە بە پەسەندکردنی تەرخانکردنی دارایی و گرتنەبەری ڕێکارە جێبەجێکارییەکانی تایبەت بە خۆی".
