سەرۆکوەزیرانی پاکستان ڕایگەیاند دوای ئەوەی ڕێککەوتنی نێوان ئەمەریکا و ئێران کەوتە بواری جێبەجێکردنەوە، ڕێگرییەکان لەبەردەم ڕێڕەوی وزە لە گەرووی هورمز دەستبەجێ هەڵدەگیرێن.
شەهباز شەریف ڕایگەیاند، "واژۆکردنی ئەم ڕێککەوتنە لە بەرزترین ئاستی حکومیی هەردوو لا، پابەندبوونیان بە چارەسەریی دیپلۆماسی ململانێکان نیشان دەدات."
ڕاشیگەیاند، "یاداشتنامەی لێکتێگەیشتنی ئیسلامئاباد دەستبەجێ دەچێتە بواری جێبەجێکردنەوە و وەک هەنگاوی یەکەم کۆماری ئیسلامی ئێران دەستبەجێ گەرووی هورمز دەکاتەوە و ئەمەریکا دەستبەجێ گەمارۆی دەریایی هەڵدەگرێت."
سەرۆکوەزیرانی پاکستان سوپاسی سەرۆکی ئەمەریکا دۆناڵد ترامپی کرد، بەو پێیەی "پابەندبوونی چەسپاوی بە دیپلۆماسیەت و ئارەزووی بۆ چارەسەرێکی ئاشتیانە بووەتە هۆی کۆتاییهێنان بە شەڕێکی تر، کە دەکرا ببێتە هۆی دەرەنجامی وێرانکەر بۆ ناوچەکە و جیهانیش."
هەروەها سوپاسی ڕێبەری باڵای کۆماری ئیسلامی ئێران موجتەبا خامنەئی و سەرۆکی ئێران مەسعود پزیشکیانی کرد بۆ "ژیری و دیدگا و دەوڵەتدارییان بە لەباوەشگرتنی ئاشتی."
جگە لە دەربڕینی پێزانین بۆ ئەندامانی شاندی دانوستانکارانی ئەمەریکا و ئێران، شەهباز شەریف هەروەها ئاماژەی کردووە بە ڕۆڵی "بونیادنەری" هەر یەک لە وڵاتانی قەتەر و سعودییە و تورکیا و میسر.
