بەغداد – INA
وتەبێژی حکومەت، حەیدەر عەبوودی، ئەمڕۆ سێشەممە دووپاتی کردەوە کە سەردانی سەرۆک وەزیران، عەلی فالح زەیدی بۆ واشنتن ئامانجی بەهێزکردنی هاوبەشیی نێوان عێراق و ئەمریکایە، هاوکات ئاماژەی بەوەش کرد کە دۆسیە ئابووری، بازرگانی و وەبەرهێنانەکان لە پێشەنگی تەوەرەکانی سەردانەکەدا دەبن.
عەبوودی بە ئاژانسی هەواڵی عێراقی (INA)ی ڕاگەیاند: "سەرۆکی ئەنجومەنی وەزیران، عەلی فالح زەیدی، لە ناوەڕاستی مانگی تەممووزدا لە سەردانێکی فەرمیدا بەرەو واشنتن بەڕێ دەکەوێت، بە مەبەستی ڕەخساندنی پاڵنەری پێویست بۆ بەهێزکردنی هاوبەشیی نێوان عێراق و ئەمریکا و بەرزکردنەوەی بۆ ئاستێکی کارا لە چوارچێوەی پەیوەندییە ستراتیژییەکانی نێوان هەردوو وڵاتدا، ئەمەش لەسەر بنەمای پرەنسیپی بەرژەوەندی هاوبەشی هەردوو گەلی دۆست".
ئەوەشی وت: "لەسەر بنەمای ئەولەویەتەکانی حکومەتی عێراق و کارنامەی وەزارییەکەی کە متمانەی ئەنجومەنی نوێنەرانی بەدەستهێناوە، دۆسیە ئابووری، بازرگانی و وەبەرهێنانەکان لە پێشەنگی تەوەرەکانی ئەم سەردانە چاوەڕوانکراوەدا دەبن، بەوپێیەی بە بەردی بناغەی ڕەوتی هاوکاریی دوولایەنە دادەنرێن"، ئاماژەی بەوەش کرد کە "حکومەت هەوڵ دەدات ئاسۆکانی هاوبەشیی ستراتیژی لەگەڵ کۆمپانیا جیهانییەکاندا فراوانتر بکات و ژینگەی وەبەرهێنان هان بدات، بە شێوەیەک کە بەشداربێت لە بەدیهێنانی دەستکەوتی ڕاستەوخۆ بۆ ئابووری عێراق و بەهێزکردنی سەقامگیری ناوخۆیی".
عەبوودی لە درێژەی قسەکانیدا وتی: "لە چوارچێوەی ئەم سەقامگیرییەدا کە پشت بە بنەما ئابوورییەکان و بەڕێوەبردنی نەرمی گۆڕاوەکانی قۆناغی ئێستا دەبەستێت، حکومەتی عێراق بەردەوامە لە چارەسەرکردنی دۆسیەی چەکی بێسەربەرشت (السلاح غير المنظم) و کارکردن بۆ سنووردارکردنی خاوەندارێتی و بەکارهێنانی تەنها لە دەستی دەوڵەت و دامەزراوە تایبەتمەندەکانیدا، بەوپێیەی ئەوان لە ڕووی دەستوورییەوە سەرپشک کراون بۆ یاریکردنی بڕیاری خاوەن سەروەری (القرار السيادي) لەم بوارەدا".
شایانی باسە، پێشتر سەرۆکی ئەنجومەنی وەزیران، عەلی فالح زەیدی لە نووسینگەی خۆیدا پێشوازی لە نێردراوی تایبەتی سەرۆکایەتی ئەمریکا، تۆم باراک کردبوو، و تێیدا تاوتێی پابەندبوونی هاوبەشی حکومەتی عێراقیان کردبوو بۆ دامەزراندنی هاوبەشییەکی بەهێز و پڕ لە دەستکەوتی هاوبەش لە نێوان ئەمریکا و عێراقدا، کە توانای بەدیهێنانی و خواستەکانی عێراقییەکانی هەبێت بەرەو داهاتوویەکی خاوەن سەروەری، ئاسایش و خۆشگوزەرانی، لەگەڵ دابینکردنی سوودی بەرجەستە بۆ هەردوو گەلی عێراق و ئەمریکا.
