بەغدا - INA
ئەمڕۆ دووشەممە، هەڵبژاردەی الرأس الأخضر (کاب ڤێردی) ئەنجامی یەکسانبوونی بێ گۆڵی بەسەر هاوتا ئیسپانییەکەیدا سەپاند، لە چوارچێوەی ڕکابەرییەکانی گەڕی یەکەمی کۆمەڵەی هەشتەم لە پاڵەوانێتیی جامی جیهانیی 2026، لەو یارییەی کە یاریگای "مەرسیدس بێنز" لە ویلایەتە یەکگرتووەکانی ئەمریکا باوەشی بۆ گرتبوو.
سەرەڕای ئەو کۆنترۆڵ و زاڵبوونەی کە هەڵبژاردەی ئیسپانیا بەسەر زۆربەی کاتەکانی یارییەکەدا سەپاندی، بەڵام نەیتوانی باڵادەستیی خۆی وەربگێڕێتە سەر گۆڵ، بەمەش لە سەرەتای ڕێڕەوی خۆیدا لە پاڵەوانێتيیەکەدا تەنها بە یەک خاڵ ڕازی بوو.
ئەم ڕووبەڕووبوونەوەیە گەڕانەوەی ئەستێرەی لاوی ئیسپانیا، لامین یامالی بەخۆیەوە بینی بۆ بەشداریکردن دوای چاکبوونەوەی لە پێکانەکەی، بەو پێیەی ڕاهێنەر لویس دی لا فوێنتی لە خولەکی 71دا وەک یەدەگ هێنایە ناو یاریگا، لە هەنگاوێکدا کە بەپێی ڕاپۆرتە ڕۆژنامەوانییە ئیسپانییەکان پێشبینیکراو بوو، کە ئاماژەیان بە ئامادەنەبوونی ئەو کردبوو بۆ یاریکردن وەک سەرەکی.
کۆمەڵەی هەشتەم هەڵبژاردەکانی ئیسپانیا، الرأس الأخضر، سعودیە و ئۆرۆگوای لەخۆدەگرێت، کە بڕیارە بەرەبەیانی ڕۆژی سێشەممە هەردوو هەڵبژاردەی کۆتایی لە چوارچێوەی هەمان گەڕدا ڕووبەڕووی یەک ببنەوە.
