بەغداد – INA – فاتمە ڕەحمە
وەزارەتی ڕۆشنبیری و گەشتوگوزار و شوێنەوار، ئەمڕۆ سێشەممە، ئامادەیی خۆی دووپاتکردەوە بۆ ڕاگەیاندنی کۆمەڵە چالاکییەکی شارستانیی بەرفراوان بەبۆنەی هەڵبژاردنی بەغداد وەک پایتەختی ڕۆشنبیری لە وڵاتانی جیهانی ئیسلامیدا، کە لە ئایندەیەکی نزیکدا دەستپێدەکات و بۆ ماوەی ساڵێکی تەواو بەردەوام دەبێت.
زەهرە جبووری، بەڕێوبەری ڕاگەیاندنی وەزارەتی ڕۆشنبیری بە ئاژانسی هەواڵی عێراقی (INA)ی ڕاگەیاند: "وەزارەت پەرۆشە بۆ چاودێریکردنی هەمەجۆریی ڕۆشنبیری و کۆمەڵایەتی لە وڵاتدا"، و پێکهاتە جیاوازەکانی عێراقی بە "چەپکە گوڵێک" وەسفکرد کە ناسنامەی نیشتمانی بەهێز دەکەن.
ڕوونیشیکردەوە، کە "بەشی هەمەجۆریی ڕۆشنبیری لە وەزارەتدا بە چڕی کاردەکات بۆ بڵاوکردنەوەی هۆشیاریی نیشتمانی و باڵادەستکردنی بەهاکانی یەکڕیزیی تێپەڕێنەری سەر بەخێڵ و پێکهاتەکان"، جەختیشی لەسەر ئەوە کردەوە کە "کۆڵەکەی سەرەکیی کارەکانی داهاتوو پشت بە دڵسۆزی بۆ عێراق و خزمەتکردنی گەل دەبەستێت، بەبێ چ جۆرە جیاکاری یان پۆلێنکردنێک."
وتیشی: "دواین چالاکیی وەزارەت بریتی بوو لە سازدانی فێستیڤاڵی یەکڕیزیی ڕەسەنی عێراقی، کە ڕەگی داکوتاوە لە بوونی چەسپاوی عێراقییەکان لە سەردەمی شارستانییەتەکانی سۆمەر، بابیلۆن و ئاشوورەوە"، ئاماژەی بەوەشکرد کە "فێستیڤاڵەکە کە بەبۆنەی ڕۆژی جیهانیی هەمەجۆریی ڕۆشنبیرییەوە ڕێکخرابوو، چالاکیی گۆرانیوتنی و نمایشی گشتگیری لەخۆگرتبوو کە لە بەرزترین لوتکەکانی باکوورەوە تا دوورترین دەشتاییەکانی باشوور، و بە تێپەڕبوون بە ناوچەکانی ناوەڕاست و ڕۆژئاوادا درێژبووەوە."
سەرنجی بۆ ئەوەش ڕاکێشا کە "سەرجەم فەرمانگەکانی وەزارەت سود لە چالاکی و بۆنە ناوخۆیی یان جیهانییەکان وەردەگرن بۆ ڕێکخستنی چالاکیی گوزارشتکەر لە یەکڕیزیی عێراقییەکان لەژێر سایەی نیشتمانێکدا کە بە سۆزەوە باوەش بۆ ڕۆڵەکانی دەکاتەوە بەبێ جیاکاری، ئەمەش وەک جێبەجێکردنێک بۆ بنەما مرۆییە بەرز و نەجیبەکان کە جەخت لەسەر یەکسانی نێوان هەمووان دەکەنەوە."
جبووری لە درێژەدا وتی: "وەزارەتی ڕۆشنبیری هەمیشە پێشەنگە لە بڵاوکردنەوەی گوتارێکی نیشتمانیی تۆکمە کە هانی تەبایی نێوان ڕۆڵەکانی کۆمەڵگە دەدات بە دڵسۆزی بۆ شەرەفی نیشتمانپەروەری و بەرزیی سەر بەم خاکبوونە"، ئاماژەی بەوەشدا کە "وەزارەت لە ئێستادا ئامادەکاری دەکات بۆ ڕاگەیاندنی کۆمەڵە چالاکییەکی بەرنامەبۆداڕێژراو بە هۆشیارییەکی شارستانییەوە؛ بۆ جێبەجێکردنی پێداویستییەکانی (بەغداد پایتەختی ڕۆشنبیری لە وڵاتانی جیهانی ئیسلامی)، کە لە داهاتوویەکی نزیکدا دەستپێدەکات."
بەڕێوبەری ڕاگەیاندنی وەزارەتی ڕۆشنبیری ڕوونکردنەوەی دا کە "داوەتنامە ئاڕاستەی سەرجەم فەرمانگەکانی وەزارەتی ڕۆشنبیری لە بەغداد و پارێزگاکان دەکرێت بۆ بەشداریکردن لەم چالاکییانەدا، جیا لە بەشدارپێکردنی زۆربەی وەزارەتەکانی دەوڵەت لە چالاکییەکانی ساڵی ڕۆشنبیریی ئیسلامیدا"، هاوکات ئاماژەی بە "ئامادەیی عێراق کرد بۆ پێشوازیکردن لە بەشداریی وڵاتانی جیهانی ئیسلامی و نائیسلامی کە ئارەزووی هاوکاری دەکەن، بە ئامانجی بەهێزکردنی دیدگا شارستانییەکان لەو گوتارە مرۆییەی ئاڕاستەی ناوخۆ و دەرەوە دەکرێت، چونکە گوتاری جوانیی ناسی (ئێستاتیکی) ڕەوانترین زمانی گفتوگۆیە لە نێوان پارێزەرانی ئاشتیدا."
