وەرزش – INA
سەرەنجام دەسەڵاتدارانی ئەمریکا هۆکاری ڕێگریکردنیان لە (عومەر ئارتان)ی ناوبژیوانانی سۆماڵی بۆ چوونە ناو خاکەکەیان ئاشکرا کرد، سەرڕای ئەوەی ناوی لە لیستی ناوبژیوانانی مۆندیالی ٢٠٢٦دا هەبوو.
دەستەی گومرگ و پاراستنی سنوورەکانی ئەمریکا دووپاتی کردەوە کە ئارتان لە ٦ی حوزەیراندا لە ئەستەنبوڵەوە گەیشتووەتە فڕۆکەخانەی میامی، لەوێش ڕووبەڕووی ڕێکارەکانی پشکنین و وردبینی زیاتر بووەتەوە کە بە "ڕۆتینی" وەسف کراون، پێش ئەوەی دەسەڵاتداران بڕیار بدەن بە "شیاونەبوو بۆ چوونە ژوورەوە" لەقەڵەمی بدەن، ئەمەش بەهۆی ئەوەی پێیان گوتووە "مەترسییەکانی تایبەت بە پرۆسەی وردبینی ئەمنی"، بەبێ ئەوەی وردەکاری زیاتر دەربارەی سروشتی ئەو مەترسییانە ئاشکرا بکەن.
دەستەکە ڕوونیکردەوە کە سەرجەم گەشتیاران، بە وەرزشوانان، ناوبژیوانان و ئەندامانی شاندەکانی بەشداربوو لە پاڵەوانێتییە نێودەوڵەتییەکانیشەوە، ڕووبەڕووی هەمان وردبینی ئەمنی دەبنەوە، وە بڕیارەکانی ڕێگەدان بە چوونە ژوورەوە یان ڕەتکردنەوەی، بە شێوەیەکی تاکەکەسی و لەسەر بنەمای زانیارییەکانی تایبەت بە ئاسایشی نیشتمانی، کۆچبەری و جێبەجێکردنی یاسا دەدرێن.
لەلای خۆیەوە، فیدراسیۆنی نێودەوڵەتی تۆپی پێ (فیفا) دووپاتی کردەوە کە ئارتان ناتوانێت بەشداری لە بەڕێوەبردنی یارییەکانی پاڵەوانێتییەکەدا بکات دوای ڕەتکردنەوەی چوونە ژوورەوەی بۆ ویلایەتە یەکگرتووەکان، جەختیشی لەوە کردەوە کە فیفا هیچ دەسەڵاتێکی بەسەر بڕیارەکانی ڤیزا و کۆچبەری وڵاتانی خانەخوێدا نییە.
ئارتان بە یەکێک لە دیارترین ناوبژیوانانی کیشوەری ئەفریقا دادەنرێت، چونکە خەڵاتی باشترین ناوبژیوانی ئەفریقای بۆ ساڵی ٢٠٢٥ بەدەستهێنابوو، و خۆی ئامادە دەکرد بۆ ئەوەی وەک یەکەم ناوبژیوانی سۆماڵی لە مێژوودا بەشداری لە بەڕێوەبردنی یارییەکانی مۆندیالدا بکات، بەڵام بڕیاری ڕێگریکردن لە چوونە ژوورەوەی، کۆتایی بە خەونەکەی هێنا تەنها چەند ڕۆژێک پێش دەستپێکردنی پاڵەوانێتییەکە.
ئەم ڕووداوە دەنگدانەوەیەکی بەرفراوانی لە ناوەندە وەرزشییەکاندا لێکەوتەوە، بەتایبەت کە ناوبژیوانە سۆماڵییەکە ڤیزایەکی کارای گەشتکردنی پێبوو، لە کاتێکدا ڕاپۆرتە میدیاییەکان دۆسیەکەیان بەستووەتەوە بە سیاسەتە توندەکانی کۆچبەری کە بەسەر هاووڵاتییانی چەند وڵاتێکدا سەپێنراون، کە سۆماڵ یەکێکیانە.
