بەغدا - INA
ئەمڕۆ ڕکابەرییەکانی پاڵەوانێتیی عێراق بۆ تۆپی بالەی کەنار دەریا (شاتیئە) دەست پێ دەکات، کە یەکێتیی ناوەندیی تۆپی بالەی عێراق لەسەر یاریگاکانی یانەی ئەرمەنی لە بەغدا ڕێکی دەخات، و لە ماوەی نێوان 9 بۆ 12ی حوزەیرانی ئەم مانگەدا بەردەوام دەبێت، بە بەشدارییەکی بەربڵاوی یانەکان و یاریزانان.
ئەندامی یەکێتیی تۆپی بالەی عێراق عەلی عومەیر، بە ئاژانسی هەواڵی عێراقی (INA)ی ڕاگەیاند: "پاڵەوانێتییە ساڵانەکە وێستگەیەکی گرنگە بۆ هەڵسەنگاندنی ئامادەیی یانەکان و دۆزینەوەی بەھرە بەڵێندەرەکان، سەرەڕای دەستنیشانکردنی یاریزانانی هەڵبژاردە نیشتمانییەکان بۆ پیاوان، خانمان و کچانی لاو وەک ئامادەکارییەک بۆ شایستە و پاڵەوانێتییە دەرەکییەکانی داهاتوو".
لە درێژەی قسەکانیدا تیشکی خستە سەر ئەوەی کە "ئەم پاڵەوانێتییە دەستپێکی چالاکییەکانی یەکێتییەکەیە بۆ وەرزە نوێیە، و پاڵەوانێتییەکی دیکەش لە پارێزگای نەینەوا بەدوای خۆیدا دەهێنێت کە خاوەنی یاریگای تایبەتە بە تۆپی بالەی کەنار دەریا، لەگەڵ سازکردنی پاڵەوانێتیی دیکە بۆ هەردوو فەیەی خانمان و کچانی لاو لە چوارچێوەی پلانی یەکێتییەکەیەدا بۆ فراوانکردنی بنکەی یارییەکە و پەرەپێدانی".
عومەیر جەختی کردەوە کە "پاڵەوانێتییەکە ڕکابەرییەکی بەهێز لە نێوان یانە بەشداربووکاندا بەخۆوە دەبینێت، بەتایبەتی لەگەڵ ئامادەبوونی ژمارەیەک لە یاریزانە نێودەوڵەتییەکان کە نوێنەرایەتی هەڵبژاردە نیشتمانییەکان دەکەن"، پێشبینی دەرکەوتنی سوپرایزی هونەری و سەرھەڵدانی یانە نوێیەکانی کرد کە توانای ڕکابەریکردنی تیمە باوەکانیان هەبێت، سەرەڕای ئەو باڵادەستییەی کە یانەی مەسافی شیمال لە پاڵەوانێتییەکانی پێشوودا سەپاندبووی.
هاوكات ئاوڕی لەوەش دایەوە کە "یەکێتیی یارییەکە ڕووبەڕووی کۆمەڵێک تەحەددی دەبێتەوە، کە لە پێشەنگیاندا سنوورداریی ژێرخانی تایبەت بە تۆپی بالەی کەنار دەریا و کەمیی یاریگا تایبەتەکانە، سەرەڕای کەمیی پاڵپشتیی دارایی و دواکەوتنی خەرجکردنی تەرخانکراوە کارگێڕییەکان لە ماوەی نزیکەی دوو ساڵەوە"، ڕوونیشی کردەوە کە ئەم بارودۆخانە کاریگەرییان هەبووە لەسەر سازکردنی پاڵەوانێتییە ناوخۆییەکان و سنووردارکردنی بەشدارییە دەرەکییەکانی هەڵبژاردەکان و یانەکان.
