هەولێر – INA
ئەمڕۆ یەکشەممە، مەسرور بارزانی، سەرۆکی حکومەتی هەرێمی کوردستان، پێشوازی لە،هاری تیۆهاریس،جێگری وەزیری دەرەوەی یۆنان و شاندێکی یاوەری کرد.
بەگوێرەی راگەیەندراوێکی نوسینگەی راگەیاندنی سەرۆک وەزیرانی هەرێم، کە بۆ ئاژانسی هەواڵی عێراقی (INA)ناردوویەتی، تیایدا هاتووە : لە دیدارەکەدا کە تایبەت بوو بە تاوتوێکردنی پەیوەندییەکانی نێوان هەردوولا، جەخت لەسەر گرنگیی پتەوکردنی زیاتری پەیوەندییەکانی هەرێمی کوردستان و کۆماری یۆنان لە بوارە جۆراوجۆرەکاندا کرایەوە، بەتایبەتی گفتوگۆ لەسەر چۆنیەتیی بەهێزکردنی پەیوەندییە دوولایەنەکان لە کەرتەکانی ئاڵوگۆڕی بازرگانی،و گەشتوگوزار،و کلتوور و شوێنەوار، هەروەها هاریکارییەکانی بواری تەندروستی کرا.
هەر بەگوێرەی راگەیەندراوەکە : لە تەوەرێکی دیکەی دیدارەکەدا، سەرۆکی حکومەتی هەرێمی کوردستان و جێگری وەزیری دەرەوەی یۆنان، بیروڕایان سەبارەت بە دوایین گۆڕانکاری و پێشهاتەکانی دۆخی گشتیی عێراق و ناوچەکە ئاڵوگۆڕ کرد، و هەردوولا هاوڕابوون لەسەر پێویستیی پاراستنی ئاسایش و ئارامیی ناوچەکە و گرنگیی بەردەوامبوونی هەماهەنگیی هاوبەش بۆ دڵنیابوون لە سەقامگیریی زیاتر.
