هێرشی مووشەکی و درەونی ئێران بۆ سەر فڕۆکەخانەی نێودەوڵەتیی کوەیت لە رۆژی 3ی مانگی شەش بووە هۆی کوژرانی یەک کەس و برینداربوونی 63 کەسی تر. بە گوێرەی بەرپرسانی کوەیتی، کوژراوەکە هاوڵاتییەکی هیندیە و لەنێو برینداربووانیشدا گەشتیار، کارمەندانی فڕۆکەخانە و هاووڵاتیان بوونیان هەیە.
ڕاپۆرتەکان ئاماژە دەکەن هێرشەکە تێرمیناڵی یەکی فڕۆکەخانەی کوەیتی بە ئامانج کردووە و زیانێکی بەرفراوانی بە بیناکان گەیاندووە، بۆیە هەموو فڕینەکان بۆ ماوەیەک ڕاگیران.
دەسەڵاتی فڕۆکەوانیی کوەیت دواتر ڕایگەیاند دوای هەڵسەنگاندنی زیانەکان و گرتنی ڕێوشوێنی پاراستن، هاتوچۆی هەندێک فڕۆکە لە تێرمیناڵی 4 دووبارە دەستی پێکردووەتەوە.
بە گوێرەی رۆیتەرز، سوپای پاسدارانی بەرپرسیاریەتیی هێرشەکەی گرتووەتە ئەستۆ و ڕایگەیاندوە کە ئەو هێرشانە وەڵامێکن بۆ هێرشەکانی ئەمەریکا دژی ئامانجەکانی ئێران، لەنێویاندا دامەزراوەکان و نەوتهەڵگرەکان لە دوورگەی قشم. سوپای پاسداران هەروەها ئاماژەی بەوە کرد کە بنکەی ئاسمانیی عەلی ئەلسەلام لە کوەیت و بارەگای هێزی دەریایی پێنجەمی ئەمەریکا لە بەحرەین بوونەتە ئامانجی هێرشەکان.
فەرماندەیی ناوەندی ئەمەریکا بە توندی بانگەشەکانی ئێرانی رەت کردووەتەوە و وتوویەتی پێگەی ئەوان لەم هێرشانە نەکراونەتە ئامانج.
لە هەمان کاتدا، سوپای بەحرەین ڕایگەیاندووە سێ مووشەک و چەندین فرۆکەی بێفڕۆکەوانی ئێرانی ڕاگرتووە. سوپای ئەمەریکاش باس لەوە دەکات دوو مووشەکی ئێرانی پێش گەیشتن بە ئامانجەکانیان لە کوەیت تێکشکاون یان کەوتوونەتە خوارەوە.
