بەغدا - INA
عومەر عەدنان وائیلی، سەرۆکی دەستەی دەروازە سنوورییەکان، ئەمڕۆ هەینی جێبەجێکردنی گەورەترین هەڵمەتی دەستبەسەرداگرتنی لە بەندەری ئوم قەسر ڕاگەیاند، کە تێیدا ڕێگری لە قاچاخچێتی بڕێکی زۆر دەرمان و ئامێری ئەلیکترۆنی کراوە.
دەستەکە لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە، ئاماژەی بەوە کردووە: لە جوڵەیەکی مەیدانی یەکلاکەرەوەدا کە نیشانەی توندکردنەوەی چاودێرییە لەسەر دەروازە سنوورییەکان، فەریق عومەر عەدنان وائیلی، سەرۆکی دەستەی دەروازە سنوورییەکان، سەرپەرشتی گەشتێکی پشکنینی کتوپڕی کرد لە ناو دەروازەی بەندەری ئوم قەسر، کە لە ئەنجامدا دەست بەسەر بڕێکی زۆر لە ماددەی سەرپێچیکاردا گیرا و هەوڵێکی قاچاخچێتی پووچەڵکرایەوە کە بە یەکێک لە مەترسیدارترین و گەورەترین هەوڵەکان لەم ماوەیەی دواییەدا دادەنرێت.
ڕاگەیەندراوەکە زیادیشی کردووە: لە کاتی سەرپەرشتی ڕاستەوخۆیدا لە گۆڕەپانی گەورەی پێشوازی، دەست بەسەر بڕێکی زۆر دەرمانی مرۆیی لە جۆری حەب و ئەمپوولی پاراسیتامۆڵ، چارەسەری پزیشکی، ڤیتامینە جیاوازەکان، ئامێری پزیشکی، پێداویستییەکانی هەڵمژینی ئۆکسجین و موغەزی لە قەبارەی جیاوازدا گیرا، کە هەموویان سەرپێچی ڕێنماییەکان بوون و چەندین ساڵ بەسەر دروستکردنیاندا تێپەڕیوە. ئەم ماددانە لە ناو کۆنتێنەری ئاسنیندا حەشاردرابوون و بە ماددەی هەرزان و بێبایەخ داپۆشرابوون بۆ ئەوەی لە دانی ڕسوماتە گومرگی و باجەکان و هەروەها وەرگرتنی ڕەزامەندییە ئۆسوڵییەکان و پشکنینی وەزارەتی تەندروستی ڕابکەن. جگە لەوەش چەند کۆنتێنەرێکی دیکە دۆزرانەوە کە بڕێکی ئێجگار زۆر ئامێری ئەلیکترۆنییان تێدابوو، لەوانە زیاتر لە (١٥٠٠٠) پازدە هەزار مۆبایلی جۆراوجۆر و ئامێری ئایپاد، لەگەڵ دەستبەسەرداگرتنی زیاتر لە (٢٠٠٠) دوو هەزار بیستۆکی جۆری ئەپڵ، کە هەوڵدرابوو بە ڕێگەی نایاسایی و لە ڕێگەی حەشارانیان لە ناو ماددەی هەرزانەوە تێپەڕێنرێن.
هەروەها ڕاگەیەندراوەکە ئاماژەی بەوەش کردووە: پرۆسەی دەستبەسەرداگرتنەکە لێرەدا نەوەستا، بەڵکو کۆنتێنەرێک دۆزرایەوە کە (فڕۆکەیەکی مەشق و ڕاهێنان)ی تێدابوو و زیاتر لە ٥ پێنج مانگ بوو گەیشتبوو و کەس بۆ وەرگرتنەوەی سەردانی نەکردبوو، بەوەش ماوەی یاسایی ڕاپەڕاندنی مامەڵەکەی تێپەڕاندبوو. هەروەها دەست بەسەر ئۆتۆمبێلی خوار مۆدێل و پارچەی یەدەگ و ئۆتۆمبێلی لێکراوە و ماتۆڕسکیلدا گیرا، کە ئەمەش قەبارەی ئەو ئاستەنگانە دەردەخات کە دەروازە سنوورییەکان لە ڕووبەڕووبوونەوەی قاچاخچێتی و یاریپێکردندا ڕووبەڕوویان دەبنەوە.
وائیلی بەگوێرەی ڕاگەیەندراوەکە جەختی کردەوە کە دەستەی دەروازە سنوورییەکان بەردەوامە لە جێبەجێکردنی ئۆپەراسیۆنەکانی پشکنینی مەیدانیی چڕ و ڕاوەدوونانی تۆڕەکانی قاچاخچێتی و سەرپێچیکارانی یاسا، جەختیشی کردەوە کە هیچ کەمتەرخەمییەک بەرامبەر هەر هەوڵێک ناکرێت کە ئابووری نیشتمانی بکاتە ئامانج یان هەڕەشە لە سەلامەتی هاووڵاتیان بکات."
سەرۆکی دەستەکە وتیشی: ئامادەبوونی ڕاستەوخۆی مەیدانی یارمەتیدەر بوو لە ئاشکراکردنی چەندین سەرپێچی جۆریی، ئاماژەی بەوەش کرد کە ڕێکاری یاسایی بەرامبەر ماددە دەستبەسەرداگیراوەکان و لایەنە سەرپێچیکارەکان دەگیرێتە بەر بە هەماهەنگی لەگەڵ لایەنە پشتیوانەکان و دەزگا پسپۆڕەکان.
لە کۆتاییدا بەیاننامەکە ئاماژەی بەوە کردووە کە ئەم پرۆسەیە لە چوارچێوەی هەڵمەتێکی چاودێری فراواندایە کە دەستەی دەروازە سنوورییەکان جێبەجێی دەکات، ئەمەش لەپێناو جێبەجێکردنی ڕاسپاردەکانی حکومەت بۆ توندکردنی کۆنترۆڵکردنی دەروازەکان و ڕێگریکردن لە هاتنەژوورەوەی کاڵای سەرپێچیکار و قاچاخ بۆ ناو وڵات.
