بەغداد – INA – ئەمنە سەلامی
ئەمڕۆ چوارشەممە، ئەنجومەنی ڕاژەی گشتیی فیدراڵی ڕایگەیاند: کە پێداویستییە تەکنیکییەکانی فۆرمی دامەزراندنی بۆ ئەو کەسانەی کۆدی وەزیفییان (الرمز الوظيفي) هەیە تەواو کردووە، جەختیشیکردەوە: کە دەنگۆی گواستنەوە و دواخستنی ئەم پلە وەزیفییانە بۆ ساڵانی داهاتوو دوورە لە ڕاستییەوە.
وتەبێژی فەرمیی ئەنجومەنەکە، فازڵ عەبدولزەهرە غەراوی، بە ئاژانسی هەواڵی عێراقی، ڕاگەیاند: "دامەزراندنی خاوەن بڕوانامە باڵاکان و قوتابییە یەکەمەکان مافێکی بەدەستهاتووە بەپێی هەردوو یاسای (٦٧) و (٥٩)ی ساڵی ٢٠١٧، ئەمەش پابەندبوونێکی یاساییە و سەرجەم دەسەڵاتەکانی دەوڵەت پێوەی پابەندن"، جەختیشیکردەوە: "هیچ ڕاستییەک لەو هەواڵانەدا نییە کە باس لە دواخستنی ئەم پلە وەزیفییانە بۆ ساڵانی داهاتوو دەکەن".
غەراوی دەڵێت: "ژمارەی پێشکەشکاران بۆ بەدەستهێنانی سیستمی کۆدی وەزیفی تاوەکو ١٦ی ئەیلوولی ٢٠٢٥، گەیشتووەتە (٤٦٩١٨) پێشکەشکار، کە بەپێی ڕەگەز دابەشبوون بەسەر (٢٢٥٩٠) نێر و (٢٤٣٢٨) مێ".
ڕوونیشیکردەوە: "ئەنجومەنەکە پڕۆسەی یەکتربڕینی وەزیفی (التقاطع الوظيفي) لەگەڵ دیوانی چاودێریی دارایی، وەزارەتی ناوخۆ، دەستەی نیشتمانیی خانەنشینی، و وەزارەتە ئەمنییەکان ئەنجامداوە، کە تێیدا ژمارەی ئەو کەسانەی کۆدی وەزیفییان پێدراوە لە خاوەن بڕوانامە باڵاکان و یەکەمەکان گەیشتووەتە (٤٣٤١٣) کەس، و هێشتا ژمارەیەکی کۆتاییش ماون کە داتاکانی خۆیان ڕاستکردووەتەوە، ئەمەش ڕێگەیان پێدەدات پێشکەش بەو فۆرمی دامەزراندنە بکەن کە ئەنجومەنەکە ڕایەڵ دەکات".
ئاماژەی بەوەشکرد: "ڕاگەیاندنی دامەزراندنەکان لەلایەن ئەنجومەنەوە بەستراوەتەوە بە پەسەندکردنی بودجەی ساڵی ٢٠٢٦ و ئەو پلە وەزیفی و تەرخانکردنە داراییانەی کە یاسای بودجەکە دەیانگرێتە خۆی بۆ دامەزراندنی ئەو کەسانەی کە دەکەونە خانەی خاوەن بڕوانامە باڵاکان و یەکەمەکان".
غەراوی جەختیکردەوە: "ئەنجومەنەکە سەرجەم پێداویستییە تەکنیکییەکانی تایبەت بە ڕاگەیاندنی فۆرمی دامەزراندنی خاوەن بڕوانامە باڵاکان و یەکەمەکانی تەواو کردووە، کە تەنها و بە شێوەیەکی تایبەت بۆ ئەو کەسانە بەردەست دەبێت کە کۆدی وەزیفییان (کۆد) وەرگرتووە بە مەبەستی پێشکەشکردن بۆ دامەزراندن".
غەراوی دووبارە جەختی لەسەر "ناڕاستی هەر هەواڵێک کردەوە کە پەیوەندی بە دواخستنی ئەم پلە وەزیفییانە بۆ ساڵانی داهاتوو هەبێت، چونکە خاوەن بڕوانامە باڵاکان و یەکەمەکان بەپێی پسپۆڕییە وردەکان و پێداویستیی وەزارەتەکان دابەش دەکرێن"، داواشی لە هۆکارانی ئەم بڕیارە کرد کە "بەدواداچوون بۆ لاپەڕە فەرمییەکانی ئەنجومەنی ڕاژەی گشتیی فیدراڵی بکەن بۆ بەدەستهێنانی سەرجەم ئەو زانیارییانەی کە پەیوەندییان بە دامەزراندنیانەوە هەیە".
