بەغدا - INA
ئەمڕۆ دووشەممە، وەزیری دەرەوەی کۆماری تورکیا هاکان فیدان، و سەرۆک وەزیران و وەزیری دەرەوە و کاروباری تاراوگەی کۆماری یەمەن شایع موحسین زەندانی، پیرۆزباییان ئاڕاستەی وەزیری دەرەوە فوئاد حوسێن کرد بەبۆنەی نوێکردنەوەی متمانە پێی وەک وەزیری دەرەوە لە حکومەتی نوێدا، هاوكات پێزانینی خۆیان بۆ ڕۆڵی دیپلۆماسیی وەزارەتی دەرەوەی عێراق دەربڕی.
ڕاگەیەندراوێکی وەزارەتی دەرەوە، کە بەدەست ئاژانسی هەواڵی عێراقی (INA) گەیشتووە، ئاماژەی بەوە کردووە کە "وەزیری دەرەوە فوئاد حوسێن نامەیەکی پیرۆزبایی لەلایەن وەزیری دەرەوەی کۆماری تورکیا هاکان فیدانەوە پێگەیشتووە، بەبۆنەی دووبارە دەستنیشانکردنەوەی وەک وەزیری دەرەوە لە حکومەتی نوێدا".
ڕاگەیەندراوەکە ئاماژەی بەوەشکردووە کە "وەزیرە تورکەکە لە نامەکەیدا قووڵترین پیرۆزبایی و هیوای سەرکەوتنی بۆ فوئاد حوسێن خواستووە لە ئەرکە نوێیەکانیدا، لەژێر تیشکی ئەو تەحەددییە گەورانە و بارودۆخە هەستیارانەی ناوچەکە پێیدا تێپەڕ دەبێت کە داوای بەهێزکردنی هاوکاری و هەماهەنگی لە نێوان وڵاتانی ناوچەکەدا دەکات".
فیدان بەپێی ڕاگەیەندراوەکە جەختی لەسەر "متمانەی خۆی بە ئەزموون و لێهاتوویی بەرزی حوسێن" کردووەتەوە، و تێڕوانینی خۆی نیشان داوە "بۆ بەردەوامیی عێراق لە بەجێگەیاندنی ڕۆڵە گرنگەکەی لە بەهێزکردنی سەقامگیریی ناوچەکە و چەسپاندنی پێگە باڵاکەی لەسەر هەردوو ئاستی ناوچەیی و نێودەوڵەتی".
ئاماژەی بە "پەرۆشیی وڵاتەکەی کردووە بۆ بەردەوامبوونی پەرەپێدانی پەیوەندییە دووقۆڵییەکانی نێوان عێراق و تورکیا، و بونیادنان لەسەر ئەو هەنگاوانەی لە قۆناغی ڕابردوودا لە بوارە جیاوازەکاندا بەدی هاتوون، بە شێوەیەک کە هاوکار بێت لە بەهێزکردنی هاوکاریی دووقۆڵیی و ناوچەیی بەپێی کارنامەیەکی ئەرێنی کە خزمەت بە بەرژەوەندیی هەردوو وڵات و هەردوو گەلی دۆست بکات".
وەزیری دەرەوەی تورکیا دووبارە جەختی لەسەر "گرنگیی بەردەوامیی پێوەندی و ڕاوێژکاریی نێوان هەردوولا لە قۆناغی داهاتوودا" کردووەتەوە.
لە هەمان چوارچێوەدا، وەزیری دەرەوە فوئاد حوسێن نامەیەکی پیرۆزبایی لەلایەن سەرۆک وەزیران و وەزیری دەرەوە و کاروباری تاراوگەی کۆماری یەمەنی برا شایع موحسین زەندانییەوە پێگەیشتووە، بەبۆنەی نوێکردنەوەی متمانە پێی وەک وەزیری دەرەوە لە حکومەتی نوێی عێراقدا.
شایع زەندانی لە نامەکەیدا، قووڵترین پیرۆزبایی و هیوای سەرکەوتنی بۆ فوئاد حوسێن خواستووە لە ڕاپەڕاندنی ئەرکەکانیدا، و جەختی لەسەر "متمانەی خۆی بە تواناکانی کردووەتەوە بۆ بەردەوامیی بەهێزکردنی ڕۆڵی دیپلۆماسیی عێراق و چەسپاندنی ئامادەیی کاریگەری لەسەر هەردوو ئاستی ناوچەیی و نێودەوڵەتی".
پێسانیشی بەو پەیوەندییە برایانەی کێشا کە کۆماری عێراق و کۆماری یەمەن پێکەوە دەبەستێتەوە، و پەرۆشیی وڵاتەکەی دەربڕی بۆ بەهێزکردنی هاوکاریی دووقۆڵیی نێوان هەردوو وڵاتی برا لە بوارە جیاوازەکاندا، بە شێوەیەک کە خزمەت بە بەرژەوەندییە هاوبەشەکان بکات و ئاسایش و سەقامگیری لە ناوچەکەدا بەهێزتر بکات.
