بەغدا - INA
ئەمڕۆ دووشەممە، دەستەی حەشدی شەعبی، کۆتاییهاتنی ئۆپەراسیۆنێکی ئەمنی لە نێوان هەردوو پارێزگای سەلاحەددین و ئەنبار ڕاگەیاند.
دەستەکە لە ڕاگەیەندراوێکدا کە بەدەست ئاژانسی هەواڵی عێراقی (INA) گەیشتووە، ڕایگەیاندووە: "فەرماندەیی ئۆپەراسیۆنەکانی سەلاحەددینی حەشدی شەعبی، کۆتایی بە ئۆپەراسیۆنێکی ئەمنی بەرفراوان هێنا کە ڕۆژی شەممەی ڕابردوو لە نێوان هەردوو پارێزگای سەلاحەددین و ئەنباردا دەستی پێکردبوو".
ئاماژەی بەوەشکرد: "هێزێک لە ئۆپەراسیۆنەکانی سەلاحەددین و لیواکانی (6، 31، 32، 51) لە چوارچێوەی فەرماندەیی ئۆپەراسیۆنەکان و بە بەشداریی بەڕێوەبەرایەتییە پاڵپشتیکارەکان لە میوەری سەلاحەددین، بەشدارییان لە ئۆپەراسیۆنەکەدا کردووە".
لە ڕاگەیەندراوەکەدا ئاماژە بەوەش کراوە کە "ئۆپەراسیۆنەکە لە چوارچێوەی پلانە ئەمنییە پێشوەختەکاندا هاتووە کە ئامانجیان دابینکردنی ئاسایشی ناوچە دەشتاییەکان و بەهێزکردنی بڵاوبوونەوەی مەیدانییە، بەشێوەیەک کە هاوکار بێت لە بەردەوامیی سەقامگیری و سەپاندنی سەروەریی یاسا".
