بەغدا - INA - محەمەد تالبی
بەڕێوەبەرایەتی هاتووچۆی گشتی، ئەمڕۆ ڕایگەیاند کە مەفرەزەکانی خستۆتە حاڵەتی ئامادەباشییەوە بۆ دابینکردنی تەناهی و ڕێکخستنی هاتووچۆ بۆ سەردانیکەرانی کازمییەی پیرۆز، هاوکات داوای لە شۆفێرانی ئۆتۆمبێل کرد هاوکاری مەفرەزەکانیان بن بۆ سەرخستنی پلانی سەردانی ئیمام جەواد (سەلامی خوای لێبێت).
عەقید حەیدەر شاکر، بەڕێوەبەری ڕاگەیاندن و پەیوەندییەکانی هاتووچۆی گشتی بە ئاژانسی هەواڵی عێراقی (INA)ی ڕاگەیاند: "پلانی تایبەت بە دابینکردنی جووڵەی ئۆتۆمبێلەکان و ئاسانکاری هاتووچۆ هاوکات لەگەڵ یادی شەهیدبوونی ئیمام جەواد (سەلامی خوای لێبێت)، بڵاوکردنەوەی بەرفراوانی مەفرەزە پیادەکان و مەفرەزە ئۆتۆمبێل و ماتۆڕسکیلەکان لەخۆدەگرێت، بە ئامانجی بەدیهێنانی بەرزترین ئاستی ئاسانکاری لە جووڵەی هاتووچۆ لەناو ناوچەی کازمییەی پیرۆز و دەوروبەری، جگە لە بڵاوکردنەوەی مەفرەزە گەڕۆکەکان لە هەردوو بەری کەرخ و ڕەسافە بۆ پاراستنی هەموو ئەو ڕێگایانەی بەرەو شاری کازمییە دەچن."
وتیشی: "ڕێنماییەکانی بەڕێوەبەری هاتووچۆی گشتی جەختیان لەسەر هاوکاری تەواو لەگەڵ حاڵەتە مرۆییەکان و پێشکەشکردنی یارمەتی بە هەموو هاووڵاتیان و شۆفێران کردۆتەوە"، ئاماژەی بەوەش کرد کە "ئەرکەکانی بەڕێوەبەرایەتییەکە ئەرکی خزمەتگوزارین و لە پلەی یەکەمدا لە بەرژەوەندی هاووڵاتیاندایە."
لە کۆتاییدا وتی: "پێشبینی دەکەین ژمارەیەکی زۆر لە سەردانیکەران ڕوو لە کازمییەی پیرۆز بکەن، بۆیە مەفرەزەکانی ڕەسافە و کەرخ بە هێزی زیادە لە پارێزگاکانی نزیکەوە بەهێز کراون بۆ بەشداریکردن لە پاراستنی ئەم بۆنەیەدا"، داواشی لە شۆفێران کرد "هاوکاری تەواوی پیاوانی هاتووچۆ بن لە ئەنجامدانی ئەرکەکانیاندا بۆ پاراستنی سەلامەتی هەمووان و بەدیهێنانی ئاسانکاری پێویست لە هاتووچۆدا."
